Broă lơh tìp mat lơh kwèng mờ ală cau pơn rơ jak ngan geh cồng nha jak ngan tàm jơh gùt ling klàng bè bơsram mờ lơh jat bồ tơngoh, nùs nhơm, rài kis mờ broă lơh Hồ Chí Minh dê; kràñ cê jơh nùs lơh ngan dră wơl mờ nùs nhơm kơlôi sơnơng să tờm is lơm tàm bơta pa.

Ală jơnau yal geh ngan bè nùs nhơm ơn pơdơng să jan, kờñ ngan bơceh lơh tài làng bol, tài kơnòl broă sền gàr Dà lơgar, tài kơnòl broă ală lơgar dờng màng bơh ală cau ling dê neh geh pơndàng bơh tàm ală jơnau cih, ală dơ̆ ràng tơlik đơs crih tam ya mờ ală dơ̆ tàm bơyai bal tơn tàm broă lơh dong làng bol in wă loh rlau tai bè nùs nhơm Cau ling Wa Hồ dê; bơh hơ̆ lơh gơrề uă ală broă lơh pa, broă lơh niam, bơceh lơh, cồng nha lơh geh tàm jơh gùt mpồl ling klàng dê.

 Dùl tàm ală gĭt nđờ rơhiang krơh niam pơn rơ jak ngan hơ̆ là Thượng úy Nguyễn Tuấn Anh, Kông ty Sền gàr lơngăp lơngai internet, Viettel, cau neh kờñ ngan kơlôi sơnơng, jòi gĭt neh yal tàm gùt plai ù rlau 600 broă ờ niam sền gàr jơnau ndơ̆p ndơr, dong ală mpồl, Tập đoàn Kông ty dờng, pleh geh ală bơta hoàc huơr kơn jơ̆ kơn jŭt ngan bè priă jền geh bơngă pin dờn. Thượng úy Nguyễn Tuấn Anh đơs: “Broă lơh tờm bơh añ dê là tus bal tàm mpồl redteam geh kơnòl broă lơh broă bè dùl nă hacker nàng jòi ală bơta ờ niam sền gàr jơnau ndơ̆p ndơr ngan bơh đah bơdìh mờ tàm dơlam tàm ală măi mok bơh ală kông ty, mpồl cau dê, bơh hơ̆ jòi geh ală broă lơh nàng bơsong ală bơta ờ niam do. Añ mờ ală cau lơh broă bal bơdìh mờ bơta kờñ ngan mờ broă lơh, kung pal sùm pơnđơl pràn lơh ngan sùm sơr lèt gan tơl ală bơta nàng lơh geh cồng nha lơh tờm măi mok, pơgồp bơnah sền gàr làng bol, Dà lơgar tàm internet.

Broă lơh gam geh bơta tus bal bơh làng bol là làng bol jơi bơtiàn dồ ết nă cau, jơh bal hìu bơnhă geh 5 nă cau sa di bơsềt khih tàm bơta sơbơng roh ngan, tàm tŭ gùng lòt tus hìu sơnơm ngài ir. Tềng đap ală bơta hơ̆ cau ling lơh sơnơm ling klàng neh jòi tơl broă lơh, jơh nùs sơm kòp mờ dong kờl ai geh bơta kis ai jơh hìu bơnhă in. Làng bol hơ̆ neh ai jơh nùs nhơm jơh nùs he dê mờ nùs nhơm ưn ngài bè ờs ngan tus yal wơl tàm broă lơh:“Oh ưn ngài ƀák sĩ uă ngan, kơnờm geh wa mờ jơh hìu bơnhă oh dê klàs bơh bơta chơ̆t roh, tus tŭ do geh pràn kơl dang wơl. Tus mờ broă lơh ngai do hìu bơnhă oh geh phan pà kờñ pơyoa pà wa in. Oh mờ hìu bơnhă pà wa in mờ kờñ đơs là hìu bơnhă oh bơh tŭ do neh sền gĭt bơsềt khih mờ bơsềt ờ khih”.

Mờ bơta jòng 90 phuk, broă lơh pờ tơlik tơn tàm gah sơñio rùp Tìp mat lơh kwèng cau pơn rơ jak ngan “Àng sơrdah nùs nhơm Cau ling Wa Hồ dê” là bơta tàm pơgồp bal bơh ală jơnau yal geh ngan bơh cau geh tìp mat lơh kwèng dê, tàm hơ̆ geh ală jơnau yal dơ̆ sơn rờp geh yal, bal mờ ală jơnau cih geh bal ală bơta pa, gơ kờñ ngan, lơh geh bơta ngoh rơngăc tus mờ cau sền, tàm bơrlŭ bal mờ dơ̆ bơyai lơh đơs crih tam ya geh rcang lơh niam ngan, jak chài ngan, pơgồp bal mờ jơnau tề lam bơh broă lơh dê; bơh hơ̆ dong cau sền in gĭt wă rlau tai bè nùs nhơm Cau ling Wa Hồ; pơgồp bơnah lơh gơrề uă ală broă lơh pa, broă lơh bơceh lơh, lơh geh cồng nha tàm jơh gùt ling klàng dê.

Kwang bàng Ƀộ Cíñ trị, Kwang atbồ Ƀan Tuyên giáo Dà lơgar ồng Nguyễn Trọng Nghĩa pà gĭt, bơh nam 2021, Quân ủy Dà lơgar neh ai lơh jat Jơnau lơh nền tàm pơrjum bè đòm jat niam nùs nhơm “Cau ling Wa Hồ dê”, jơh nùs dră wơl mờ nùs nhơm kơlôi sơnơng să tờm is lơm tàm bơta pa. Bơh jơnau sồr hơ̆, tus tŭ do mpồl ling klàng bol he dê sơlơ dờng pràn tơl làm, kờp bal mờ broă lơh pơlam tàp, broă lơh rcang lài tam lơh, lơh broă lơh sa. Gơnoar broă bơh mpồl ling klàng lơh broă mờ is ồn là nùs nhơm bơh Cau ling Wa Hồ dê ngai sơlơ geh pơrlòng, ngai sơlơ geh lơh àng sơrdah tàm jơh ală gah broă kờp jơh bal tàm broă sền gàr gơnoar tờm, kung bè rcang lài pleh mờ trồ tiah lơh aniai, kòp aniai. Mờ mpồl ling klàng tŭ lơi kung phi să nàng sền gàr bơta hờn chờ, bơta pràn ai làng bol in. Gơtùi đơs nền là, Jơnau lơh nền tàm pơrjum bơh Quân ủy Dà lơgar dê bè “ Đòm jat niam nùs nhơm “Cau ling Wa Hồ”, kràñ cê jơh nùs lơh ngan dră wơl mờ nùs nhơm mìng kơlôi sơnơng să tờm is lơm tàm bơta pa” là Jơnau lơh nền tàm pơrjum kwơ màng ngan, jal mhar ngan, pơgồp bơnah bơt bơtàu mpồl ling klàng pràn kơldang, kơ̆ kơl jăp bè cíñ trị, tơnguh uă bơta niam bal, bơta pràn tam lơh, lơh sir jak ngan tơl kơnòl broă geh jàu.