Ala măt Mpồl Củ tịc Anih duh broă Mặt trận dà lơgar Việt Nam, ồng Đỗ Văn Chiến neh dờp bơta dong kờl bơh Ƀăo Làng bol dê 500 tơlak đong; Tập đoàn Chah phan kwơ tàm ù Việt Nam dê 10 tơmàn đong; Mpồl ală kwang bàng, cau lơh broă bơh Kông ty Bơcri priă bal jàu phan tềm pềr dê 1 tơmàn 200 tơlak đong; Hìu bơnhă mò Trịnh Thị Mùi, ơm tàm lơgar Kộng hoà ală ƀang Đức 200 tơlak đong; Ală mpồl Hìu sơnơm làng bol Việt Nam dê lơh is 500 tơlak đong; Ală mpồl lơh sa kă bro lơh gơlik mờ lơh niam wơl măy mŏk rơndeh rơndồ- đèng ƀòn dờng Hồ Chí Minh 900 tơlak đong.

Ki ngàm cih dờp ală nùs nhơm niam bơnĕ ngan bơh ală mpồl cau, cau dồ nă să is dê, ồng Đỗ Văn Chiến đơs nền, Mpồl Hòi jà Dong kờl Dà lơgar dê hơ rơ̆p jun ală phan pà geh kwơ ngan do tus mờ cau dờp lèng dồ bă loh làng, song dơ pă, lam jăt sền nền nòn broă ngui priă jền di jơnau kờñ mờ geh cồng nha.