Tàm Kụm lơh sa mờ măi mok Tân An, ƀòn dờng Buôn Ma Thuột, uă kông ty yal rơ wah cau lơh broă mai phan, điện tử, lơh sơnò mat ờ ngan mờ khà uă ngan. Bulah geh ală broă dong kờl niam ngan bè priă nhai, priă jờng, dong kờl geh ai ơm rlô tàm tơngai kàl lơh sa mơya uă kông ty kung gam ờ hềt jòi geh tơl cau lơh phan. Ồng Trần Chí Vĩ, Kwang atbồ mpồl lơh sa kă bro mai phan Lực Thiên pà git, kông ty geh jơnau kờñ rơ wah tai 300 nă cau lơh broă, mơya mìng rơp rơ wah geh mờr 50 nă cau lơh broă: “Tŭ tus kàl pik kơphe, pik tiêu dilah cau lơh phan geh ù tam phan, khi rơp geh dong kờl cih mat dan ơm rlô tơngai hơ̆ nàng rê dong broă hìu bơnhă. Kung kơp kờñ jơh kàl pik kơphe broă rơ wah rơp ƀuơn rlau”.

Ai tàm kụm lơh sa mờ măi mok Cư Kuiñ, bơta ờ tơl cau lơh broă, ngan là cau lơh broă geh bơta chài uă, lơh uă kông ty pal tam gơl wơl broă rơndap lơh lơh sa kung bè dờp sră dan blơi phan bơh mpồl lơh broă bal dê. Ồng Vũ Nguyễn Tường Linh, drơng broă rơ wah cau lơh broă bơh Kông ty kơphe Ngon dê pà git, Kông ty neh lơh bal tac phan lơh gơs mờ ală hìu bơsram kao đẳng, đại họk tàm càr mờ kờñ bơto broă lơh ờ sa priă, mơya khà sră dan sac rơ wah mut lơh broă kung ờ hềt geh bè bơta kơp kờñ: “Kông ty bol hi kờñ rơ wah pơgap 50 nă cau bơh cau lơh broă ờs mờng tus cau lơh broă mờng chài. Bơta kal ke bol hi dê là ờ tơl bè mpồl cau lơh broă mờng chài, ngan là ală gah broă ngui bơta chài măi mok bè đèng, kơ khí. Mờ bơta krơi is bơh kông ty bol hi dê là dùl kông ty bơh lơgar ndai bơcri priă, bol hi kờñ geh tai bơta chài đơs dà lơgar ndai, do là dùl bơta kal ke bơh mpồl cau lơh broă tàm càr Dăk Lăk dê”.

Bơta geh ngan ờ tơl cau lơh phan gam gơlik geh uă ngan tàm càr Dăk Lăk. Mò Nguyễn Thùy Tâm, cau lơh broă ờs mờng gah sră pơ àr, cau lơh broă kông ty Trung Nguyên Franchising tàm Dăk Lăk pà git, Kông ty neh tơnguh broă dong kờl mơya kal ke ngan rơ wah geh cau lơh broă: “Tŭ ală bơyô lơh broă, ală bơyô geh pơrlòng tơnguh kai priă nhai, geh kĭ sră pơrgon lơh broă wil tơl bal mờ ală broă dong kờl jat adat lơh broă. Bơdìh hơ̆ tai, ală bơyô gam geh priă jờng KPI, pà phan di ngai deh, ngai chờ, ngai sa tềp mờ ngan là geh broă dong kờl cau lơh broă jŏ nam. Đah kông ty bol hi kung pơnđàng kờñ rơ wah cau lơh broă tàm uă ngan anih mblàng yal jơnau, mơya tŭ do khà kờñ rơ wah kung ờ hềt tơl sơl”.

Jat jơnau yal bơh Anih tờm yal tơnggit jòi broă lơh càr Dăk Lăk, tàm 6 nhai bồ nam, Anih tờm geh rlau 50 dơ̆ mpồl lơh sa kă bro tus bal tàm rlau 20 dơ̆ yal tơnggit jòi broă lơh mờ jơnau kờñ rơ wah git nđờ jơt rbô nă cau lơh broă. Bulah bè hơ̆, mùl màl khà cau geh rơ wah ờ tơl jat jơnau kờñ. Ồng Nguyễn Hoàng Giang, Kwang atbồ Sở Lao động – Thương ƀiñ mờ Xã hội càr Dăk Lăk mblàng lơh loh: “Rơ wah cau geh ƀằng kâp là bơta kal ke lài ngan. Bơta kal ke dơ̆ 2 là tŭ rơ wah geh den mpồl lơh sa kă bro pal bơto bơtê wơl, ờ gơtùi ngui tài phan bơna, măi mok bơto bơsram, jơnau git wă bơh hìu bơsram dê ờ hềt gơ jat mờ mpồl lơh sa kă bro là khi kờñ ñchi”.

Kung jat ồng Nguyễn Hoàng Giang pà git, nam 2024, càr Dăk Lăk lơh ngan ai geh broă lơh rlau 30 rbô nă cau in. Nàng lơh geh jơnau kờñ do, ală anih bơto broă lơh pal tơnguh bơta niam bơto bơtê, drơng jơnau kờñ bơh mpồl lơh sa kă bro dê, bơto bơtê jat jơnau kờñ ngan ngồn bơh mpồl lơh sa kă bro dê. Bè đah cau lơh broă pal pơlam tàp, sơlơ tơnguh tai mờng chài lơh broă mờ jơh nùs, rơcang lài jòi broă lơh.