Hìu Dong kờl ròng siam mờ sền gàr mpồl bơtiàn tơrgùm bal càr Gia Lai bơh jŏ ngan neh gơs hìu ơm bal bơh uă kơnòm dềt ờ geh cau ròng siam, gơtìp uă kal ke dê. Geh ờ uă kơnòm dềt kis đềt mềr mờ anih do bơh tŭ rơ̆p deh, uă kơnòm dềt ndai tus tàm do tŭ hìu nhă gơtìp kal ke. Oh Kpuih H’ Kiều pà git: “Kòn mờ oh kòn dê ơm tàm do neh mờr 07 nam. Bơh tŭ mŭt ơm kis tàm do ală mlŏ đềt mềr ngan tàm broă drơng gàr, sền gàr, kòn ưn ngài ală mlŏ tàm anih do neh ròng, bơto bol oh git wă ală jơnau mờ gơs dờng pràn”.

Mò Tạ Thị Anh Đào, Kwang atbồ Anih Dong kờl ròng siam mờ sền gàr mpồl bơtiàn tơrgùm bal càr Gia Lai pà git, anih do tŭ do gam ròng siam rơlao 60 nă kơnòm dềt kòn đời mờ kơnòm dềt koĕt kơl te. Ală cau pơgru, cau lơh broă tàm do sùm gơboh, sền gàr ală kơnòm dềt bè cau tàm hìu nhă bal. Mò Tạ Thị Anh Đào pà git: “Bơdìh mờ broă lơh jăt gùng dà broă lơh bơh Dà lơgar dê là jơnau bơto sồr sồ 20 dê, ală sao geh priă sa, priă ơm kis, ào mpha… bơdìh hơ̆ tai, anih do dờp geh broă sền gàr, dong kờl bơh ală mpồl lơh broă, cau dùl nă să nàng ală sao in geh rài kis ngai sơlơ niam rơlao. Lơh bè lơi nàng ală sao tàm anih do kung gam gŏ là să tờm sùm geh sền gàr mờ gơboh kờñ bal bơh gùt mpồl bơtiàn dê”.

Jơnau yal bơh Sở Lơh broă-Cau ling sồt să mờ Mpồl bơtiàn càr Gia Lai dê, gùt càr tŭ do geh rơlao 5 rơbô nă kơnòm dềt geh rài kis gơtìp kal ke. Bal mờ hơ̆ là git nđờ rơhiang rơbô nă kơnòm dềt tàm ală tiah kal ke. Mờ jơnau kờñ gàr niam gơnoar kơnòm dềt mờ rơcang kơrian ală bơta di gơlan lơh aniai, rềs àr, chơ̆t jê, ală gah lơh broă, ală kơnhoàl, thị xã mờ ƀòn dờng neh bơyai lơh uă broă lơh mblàng yal, tơnguh uă jơnau git wă bal mờ kơnòl bơh mpồl bơtiàn dê. Ồng Phạm Trần Anh, Phó Kwang atbồ Sở Lơh broă-Cau ling sồt să mờ Mpồl bơtiàn càr Gai Lai đơs: “Càr Gia Lai geh uă ngan tàm ală tiah ngài, ƀlàng nhơl ai kơnòm dềt in ờ tơl uă ngan. Sở kung neh sồr ală mpồl lơh broă tàm tơngai ơm rơlô bơkang bơyai lơh geh ală ƀlàng nhơl nàng ai ală kơnòm dềt in tàm tŭ ală kơnòm dềt gam ơm rơlô bơkang nàng geh ƀlàng nhơl niam; pleh mờ bơta ală kơnòm dềt lòt tus tàm ală tiah ờ niam mờ gơtìp rềs àr pơlai ngan”.

Nam lài, Kes priă Dong kờl sền gàr kơnòm dềt càr Gia Lai neh lam tă geh rơlao 3 rơbô 380 tơmàn đong, tàm hơ̆ geh priă ngan bal mờ phan bơh ală cau dong kờl pà. Bơh tàm broă dong kờl do, tàm nam 2023 mờ 6 nhai bồ nam 2024, Mpồl atbồ Kes priă neh tă 2 rơbô 435 tơmàn đong nàng reh plai nùs ai 20 nă kơnòm dềt geh rài kis gơtìp kal ke, 17 nă kơnòm dềt gơtìp pờih mbùng; pà 50 nơm rơndeh coh ai kơnòm dềt geh rài kis gơtìp kal ke in.

Bi Đỗ Đức Thanh, Phó Ƀí thư Tỉñ đoàn càr Gia Lai yal, tàm Nhai lơh broă tài kơnòm dềt nam do, ơruh pơnu tàm càr neh jào pà git nđờ rơbô pò phan, ală broă lơh tàm rài kis, bơyai lơh broă tam gơl siồ siă đù ai phan pà, pà rơndeh coh ai kơnòm bơsram rơƀah bơsram jăk nàng pơn dờm pơniang, lam sồr ală kơnòm dềt in. Bi Đỗ Đức Thanh pà git: “Mpồl đơng lam Tỉñ đoàn kung neh ai geh jơnau kờñ là ală mpồl lơh broă tàm ală mpồl đoàn ală tiah pơn jăt tai dờp dong kờl sùm kơnòm dềt geh rài kis gơtìp kal ke, geh khà măt mờ lơh broă mùl màl ờ mìng mờ phan, priă bal mờ ală pò phan mờ gam bơyai lơh tus còp să, pơn dờm pơniang dong kờl ală kơnòm dềt tàm broă bơsram sră mờ rài kis”.

Mơya, mờ bơta krơi is là càr geh gal làng bol ală jơi bơtiàn ờ gal cau, lơh sa gam uă kal ke, den tàng pal lơh ngan sùm bal mờ broă tus bal bơh gùt mpồl bơtiàn tàm broă drơng gàr kơnòm dềt in.

Sền gàr, drơng gàr mờ bơto bơtê kơnòm dềt tŭ do là ai geh cau lơh broă jăk chài, ai geh bơta bơtàu tơnguh kơl jăp dà lơgar in tàm tơnơ̆ do. Nhai lơh broă tài kơnòm dềt là dơ̆ nàng ală kấp, gah lơh broă, cau geh nùs nhơm niam tàm càr ai tơngŏ kơnòl tàm broă sền gàr, drơng gàr mờ bơto bơtê kơnòm dềt. Sở Lơh broă-Cau ling sồt să mờ mpồl bơtiàn càr Gia Lai hòi jà ală mpồl lơh broă, cau dùl nă să, mpồl lơh sa kă bro, cau geh nùs nhơm niam sền gròi tus bal tă bơta pràn nàng dong kờl mùl màl, geh cồng nha ai kơnòm dềt geh rài kis gơtìp kal ke, kơnòm dềt gơtìp ờ pràn in… bơh Kes priă Dong kờl ròng siam mờ sền gàr kơnòm dềt càr Gia Lai dê. Mờ ală broă lơh ngan bơh gùt mpồl bơtiàn, kơnòm dềt geh rài kis kal ke tàm càr Gia Lai gam rơhời geh drơng gàr, sền gàr mờ geh rài kis niam rơlao.