Uă ngan ală bơta broă lơh bơt bơtàu gơtìp ờ diơng kơn jơ̆ ngan tài bơh bơtơ̆t gơtìp gơmut dà, lơh ơdiơng bồ bơtơ̆t, ờ diơng tiah dà hòi, rơdàng, bơcah ding dà mờ ală van....

Kờp jơh priă kờp dŭ lài bơcri lơh kơnhăp wơl mờ lơh niam wơl pơgap 115 nơm bơtơ̆t, tơnau dơng dà ờ diơng rlau 820 tơmàn đong. Tàm hơ̆ priă neh geh ai nàng lơh niam wơl, lơh kơnhăp wơl ai 12 nơm bơtơ̆t tàm nam 2024 mờr 56 tơmàn đong; priă tă lơh kờp dŭ lài kờñ geh nàng bơcri priă lơh kơnhăp ai 103 nơm bơtơ̆t in mơya ờ hềt geh priă là rlau 760 tơmàn đong. Nàng gàr niam lơngăp lơngai tàm tơngai do, ală anih lơh broă geh gơnoar neh sồr tơrmù ƀà broă dơng dà tàm ală tơnau dà geh pơhìn roh bal lơngăp lơngai uă.

Tềng đap bơta gơlik geh kal ke bơh trồ tiah dê, càr Dăk Nông gam ai ală mpồl lòt sền ală tơnau dơng dà nàng geh broă lơh rơcang lài drơng. Bulah bè hơ̆, bơta pal kơlôi rơcang là gùt càr mìng rơp geh 30 tàm 256 tơnau dơng dà neh lơh mờ lơh jat broă rơndap lơh rơcang lài drơng mờ broă jal mhar gơlik geh.

Gah lơh broă geh gơnoar càr đal git geh 81 broă lơh ờ niam, ờ diơng, tàm hơ̆ geh 24 broă lơh ờ gơtìp ờ diơng kơn jơ̆ ngan, geh jơnau pơhìn gơlik geh bơta ờ niam uă. Ală broă lơh do gam gơlik geh bơta nchùn tàm bàr pe rơkàng hơ đang mờ rơkàng hơ đơm, rơkàng hơ đang ờ hềt geh lơh kơ̆ mờ bê tông halà geh lơh kơ̆ mơya neh gơbàn ờ diơng, uă broă lơh yuh dà tih mờ ù gơtìp tơrlah 2 gah, bơnàng gơ lìu. Càr Dăk Nông kung gam kờñ ngan geh bơta sền gròi, dong kờl bơh dà lơgar dê nàng mhar geh broă rơndap lơh rơcang lài drơng mờ ală bơta jal mhar gơlik geh, lơh niam wơl ală broă lơh gơbàn ờ diơng.