Tơngai do, mpồl kwang bàng jăt sền bơh Ủy ƀan Thường vụ Quốk hội bè “Broă lơh jăt broă dong kờl adăt boh lam bè bơtàu tơnguh năng lượng tơngai bơh nam 2016 tus 2021” neh lơh broă, tus sền mùl màl tàm ală càr Quảng Nam, Quảng Ngãi, Sơn La, Gia Lai, Bạc Liêu, Bà Rịa-Vũng Tàu, Cà Mau mờ ƀòn dờng Hồ Chí Minh; lơh broă mờ Cíñ phủ, ală ƀộ, gah lơh broă dà lơgar, anih lơh broă, mpồl lơh broă, mpồl lơh sa kă bro gơrềng bal; bơyai lơh ờ uă dơ̆ pơrjum cri bơyai drơng broă lơh ai mìng tơngu me jăt sền in, tàm hơ̆ uă ngan là pơrjum cri bơyai nàng ai pơgồp jơnau đơs bơh ală cau jăk chài bè rơndăp broă cih tàm Jơnau yal cồng nha jăt sền.

Tơngu me jăt sền nàng sền wơl tơl, di pal, tơl ală bơta broă lơh jăt broă dong kờl adăt boh lam bè bơtàu tơnguh năng lượng tàm tơngai do. Bơh tŭ hơ̆, ai gŏ ală broă lơh tờm, geh cồng nha, jŏ jòng nàng lơh jăt kơrnoăt boh lam jơh mờ lơh jăt di tŭ ală gùng dà broă lơh bơh Đảng dê bè bơtàu tơnguh năng lượng.