VOV4.K’Ho- Broă gàr niam bơta lơngăp lơngai dơ̆ pơrlòng geh sền gròi ngan.

VOV4.K'Ho- Dơ̆ 2 bơh Pơrjum dơ̆ 7, Quôk hội khoă XV geh lơh tàm poh lài mờ uă tơngume kuơmàng. Tŭ cribơyai tàm hìu pơrjum bè jơnau lơh nền bơcri priă Rơndap broă lơh bơcri priă lơh gùng rơndeh ntoat mhar tiah đah tô – tiah đah jum dà lơgar hờ tiah đah mat tơngai mut gơ Gia Nghĩa (càr Dăk Nông) – Chơn Thành (càr Bình Phước), ală kwang bàng sồr ai gơnoar rơndap broă lơh geh ngui 2, 3 gùng dà, broă lơh krơi is nàng tơnhàu phan kuơ tàm ù ờs mờng lơh phan lơh gùng. Mờ kung sồr tàm pơnring kes priă, ai tơl priă bơcri nàng gàr lam lơh rơndap broă lơh di tơngai pơrgon, lơh gơs tàm lồi nam 2026.

VOV4.K’Ho- Dơ̆ jào Khà jờng Sră ƀăo Dà lơgar dơ̆ 18 geh bơyai lơh di tàm dơ̆ tơnkah 99 nam Ngai sră ƀăo Kăc màng Việt Nam. Do là dơ̆ nàng jờng rơ ală cau cih, jơnau cih sră ƀăo jăk ngan in, geh pơgồp bal pràn tàm broă lơh sră ƀăo dà lơgar đơs is mờ ai broă bơ̆t bơtàu mờ sền gàr Dà lơgar đơs bal. Do kung là dơ̆ nàng pơlam mpồl ală cau lơh ƀăo pal lơh ngan sùm nàng geh bơta pràn bơ̆t bơtàu broă lơh Sră ƀăo kăc màng Việt Nam geh uă nùs nhơm tam dră mờ dong kờl, jăk chài, lơh pa, tài bơta kwơ dà lơgar bal mờ làng bol dê.

VOV4.K'Ho- Mang òr (16/06), Ƀộ cih sră ƀău Kộng sản, Mpồl duh broă sùm Ủy ƀan Mặt trận dà lơgar Việt Nam, Gah đơng lam Mpồl ling sền gàr tiah nhàr lơgar bơh dà lơgar dê bơyai lơh Broă lơh jờng rơ cau geh bơngă pin dờn geh pơn rơ gơguh jak tiah nhàr dà lơgar, bồt dà lềng dơ̆ 2, nam 2024 mờ tơngume “Anih kơp kơnờm bơh ƀòn lơgar dê”.

VOV4.K’Ho- Dơ̆ 2 bơh Pơrjum dơ̆ 7 kờp dŭ jŏ jòng bơh ngai do 17/06 tus ngai 28/06. Quôk hội sền sơ wì ring bal uă rơndăp broă lơh adat, jơnau rcang cih Jơnau lơh nền tàm pơrjum kung bè Jơnau lơh nền tàm pơrjum ală broă kwơ màng gơwèt gơnăp gơnoar.

VOV4.K'Ho- Poh lài, geh lơh pơrjum dơ̆ 34 bơh Ủy ƀan Thường vụ Quôk hội dê. Đơs tàm pơrjum, Củ tịc Quôk hội ồng Trần Thanh Mẫn pà git, do là dơ̆ pơrjum ờs mờng nhai 6, bơyai lơh tàm tơngai đah 2 dơ̆ pơrjum dơ̆ 7, Quôk hội khoă XV dê. Pơrjum geh lơh tàm 3 ngai ai jơnau đơs tàm 16 tơngume kuơmàng.

VOV4.K’Ho- Drim òr (14/06), Sở Lơh broă-Cau ling sồt să mờ Mpồl bơtiàn càr Dăk Lăk pơgồp bal mờ Mpồl lơh broă càr bơyai lơh Ngai chờ broă lơh nam 2024 mờ tơngu me “Tơrbŏ bal broă lơh – Gùng dà lơh broă – Kơl jăp rài tơnơ̆ do”.

VOV4.K'Ho - Lam lơh Broă lơh jơnau kờñ dà lơgar bơtàu tơnguh lơh sa – mpồl bơtiàn tiah làng bol jơi bơtiàn dồ êt nă cau mờ tiah kơh bơnơm tơngai bơh nam 2021 tus nam 2030, càr Bình Định lơh ngan, tơrmù kờp bal bơh 2 tus 3% pah nam khà cau bau gờñ mờ gàr sùm ờ gơlik geh bơta bau cau rềp jơi nòi gơ wèt mờ ală tiah, jơi bơtiàn dồ êt nă cau cau geh khà bau gờñ uă.

VOV4.K'Ho - Dơ̆ tìp mat geh bơta tus bal bơh ală kwang đơng lam bồ, cau kơ đơng yàng bơh 45 mpồl jat yàng gơ wèt 16 gah jat yàng neh geh Đảng, Dà lơgar dờp.

VOV4.K’Ho- Ală nam do, càr Gia Lai neh ai uă ngan priă bal mờ tơngai lơh broă nàng sền gròi tus broă drơng gàr mờ sền gàr kơnòm dềt, tàm hơ̆ uă ngan là gơwèt mờ ală kơnòm dềt geh rài kis gơtìp kal ke, kơnòm dềt tàm tiah ngài. Lơh jăt Nhai lơh broă tài kơnòm dềt nam 2024 mờ tơngu me “Lơh broă mùl màl, ai lài bơta pràn kơnờm dềt in”, càr Gia Lai hòi jà gùt mpồl bơtiàn tus bal sền gàr kơnòm dềt, bơ̆t bơtàu tiah kis lơngăp lơngai, niam bơnĕ nàng kơnòm dềt bơtàu tơnguh tơl ală bơta.