VOV4.K’ho- Ngai 05 nhai 06 nam 1911, Chủ tịch Hồ Chí Minh sơn đờm lik bơh lơgar Việt Nam lòt git tus tàm dunia nàng jòi gùng tơnklàs dà lơgar, tơnkàs jơi bơtiàn lik bơdìh broă sơgràm phà bơh ling lơgar Tây sò tơm. Di tơnkah 110 nam ngai Bác Hồ guh tàm ơhò lơgar Tây Latouche-Tréville nàng lòt jòi “Khăt gơboh ai làng bol añ in, Lơngăp lơngai is ai Dà lơgar añ in” jà làng bol mờ gơ̆p bơyô bal mờ cau ai tơngit jơnau đơs Vũ Hường tàm ƀòn dờng Hồ Chí Minh tus còp tiah kah wơl mờ lài do Bác Hồ neh đì ơhò lòt jòi gùng tơnkàs dà lơgar-Bảo tàng Hồ Chí Minh, tàm ƀòn dờng Hồ Chí Minh-Bến Nhà Rồng:

Bảo tàng Hồ Chí Minh-tàm ƀòn dờng Hồ Chí Minh hìu sồ 01, gùng Nguyễn Tất Thành, Quận 4, ƀòn dờng Hồ Chí Minh. Do là anih geh git tus mờ măt sơnđan mờng koèng ngan mờ làng bol kis tàm ƀòn dờng sơnđan măt Bác Hồ- Bến Nhà Rồng. Tam toh tềng mpồng dờng bơh bảo tàng là ñjrong cơ Thủ Ngữ mờ rơlao 150 sơnam.

           Pang sră cih priă nhai bơh ală cau lơh broă tàm ơhò geh cih măt Văn Ba ràng tơlik tàm Bảo tàng

Lài do, gơlang bến Nhà Rồng là hìu lơh broă bơh Tổng công ty Vận tải Hoàng Đế dê geh lơh tàm dùl anih ơhò ơm dờng mờ neh lơh bơh rơnàng lơgar Tây sò tơm. Pơgăp mờ do 110 nam, ngai 05 nhai 6 nam 1911, klao pơnu geh nùs nhơm kờñ gơboh mờ dà lơgar sơnđan là Nguyễn Tất Thành tŭ hơ̆ sơnđan măt là Văn Ba neh mù tàm ơhò Amiral Latouche Tréville, lik bơh anih ơhò ơm Sài Gòn lòt jòi gùng tơnklàs dà lơgar.

Anih do geh sơn đờm mŭt lơh tàm nam 1862 jăt broă lơh hìu phương Tây dê, mơya hờ đang rơkàng hìu geh ơn bàr nơm nggài châu bồ mŭt tàm àng kơnhai – dùl bơta bơka ờs mờng bơh hìu yàng phờk tàm lơgar Việt Nam dê. Hơ̆ kung là tơngu me tờm tài bè lơi anih do geh sơnđan là Nhà Rồng ha là Bến Nhà Rồng.

Tơnơ̆ do, nam 1970, Tổng công ty Vận tải Hoàng Đế tam gơl gơs công ty vận tải Hàng hải, mờ neh ai lơh wơl kiă bơh rơkàng hìu do in, ala bàr nơm nggài lài do mờ bàr nơm nggài ndai mờ bồ ơm wơl ke lĭk hờ bơdìh, tam gơl rùp àng kơnhai gơs phan lời kir, phan kơ̆t ơhò mờ bồ ơseh tus tŭ do.

    Bảo tàng ràng tơlik rùp, sră cih bè Bác Hồ bơh rơnàng knòm să tus tàm tŭ lòt jòi gùng dong klàs dà lơgar

Bảo tàng geh lơh 1 cờn tàm tiah, 2 cờn hờ đang mờ 7 jơdŭ ràng tơlik jăt tơngu me mờ 8 anih ràng tơlik ndai mờ kờp jơh bă ù ơnàng mờr 1 rơbô 500 thơ̆k vuông, yal di pơgăp 11 rơbô pang sră, phan, rùp bè rài kis, broă lơh kăc màng bơh Chủ tịch Hồ Chí Minh dê. Tàm hơ̆ geh 03 jơdŭ đơs uă tus mờ broă Bác Hồ lòt jòi gùng tơnklàs dà lơgar, nùs nhơm đềt mềr bơh Bác Hồ dê gơwèt mờ làng bol đah jum dà lơgar mờ nùs nhơm bơh làng bol đah jum dà lơgar gơwèt mờ Bác Hồ.

Mò Phan Quế Huỳnh, cau mblàng jơnau tàm hìu Bảo tàng Hồ Chí Minh tàm ƀòn dờng Hồ Chí Minh pà git: Tiah ràng jăt tơngu me lài ngan tàm cờn dơ̆ 1 bơh Bảo tàng mờ tơngu me: Rài gam kơnòm mờ neh pơnu bơh Chủ tịch Hồ Chí Minh dê; lài ngan lơh broă kờñ gơboh mờ dà lơgar bal mờ kăc màng; Chủ tịch Hồ Chí Minh dờp chủ nghĩa Mác-Lênin mờ ai tơngŏ gùng kăc màng Việt Nam. “Tàm Bảo tàng geh ràng broă lơh bè ơhò Amiral Latouche Tréville. Ơhò gơwèt công ty vận tải tơrgùm bal gam sơnđan là gah 5 sơrmañ, là 1 tàm 6 nơm ơhò kă bro geh lơh niam ngan gơwèt 5 sơrmañ. Jăt broă sền gròi ơhò lik mŭt tàm anih ơhò ơm Sài Gòn nhai 6 nam 1911, geh cih ngai 02 nhai 6 nam 1911 ơhò bơh Hải Phòng neh mŭt tàm anih ơhò ơm Sài Gòn, gah 5 sơrmañ neh rơwah tai ờ uă cau lơh broă tàm ơhò, tàm khà ală cau dan broă lơh geh klao pơnu Nguyễn Tất Thành neh ai măt sơnđan là Văn Ba, cau lơgar An Nam, lơh broă trŭ sa tàm ơhò, geh dờp priă nhai là 45 Frans, priă lơgar Tây, ndrờm mờ 4 đong 5 hào, do là khà priă ờ uă ngan tàm tŭ hơ̆ dê. Ală pang sră geh cih, bal mờ rùp, mờ phan geh ràng tơlik tàm bảo tàng den ndrờm geh ală broă lơh tàm rài lài do, cèng is tàm să jan ală jơnau krơi is. Di gơlan gơtùi yal tus mờ pang sră priă nhai bơh ală cau lơh broă tàm ơhò Amiral Latouche Tréville, pang sră nhai bal mờ ală sră cih, phan tàm bảo tàng gơtùi dong kờl cau tus sền di gơlan wă rơlao tai bè dơ̆ lòt jòi gùng tơnklàs dà lơgar gơtìp uă ngan glar bòl bơh Bác Hồ dê”.

         Bảo tàng sùm bơyai lơh ală dơ̆ ràng tơlik rùp mờ sră cih bè rài kis bal mờ lơh broă bơh Bác Hồ dê

Ală dơ̆ sơn đờm ngai 2 nhai 9 ha là tơnkah ngai deh Bác Hồ ngai 19 nhai 5, Bảo tàng Hồ Chí Minh-tàm ƀòn dờng Hồ Chí Minh mờng wă gal ngan cau năc tus sền mờ kah kơlôi tus Bác Hồ. Bŭ lah tàm sơnam pa tào ha là neh dờng sơnam, bŭ lah là cau lơgar Việt Nam ha là cau lơgar bơdìh, ală cau ndrờm tơlik nùs nhơm kờñ gơboh mờ ưn ngài tềng đăp mờ broă lơh dờng màng bơh Bác Hồ dê: “Pah tŭ tus tàm do den añ pơnyờ să ngan là dùl nă cau bơh dùl lơgar geh dùl nă cau bèp kra jăk chài drơng gàr tus mờ dà lơgar he bè do. Pah dơ̆ tus tàm do, nùs nhơm gơlơh ngoh rơngăc ngan. Tŭ lam kòn tus tàm do sền kung bè hơ̆ sơl, añ kờñ să bồ he chờ hờp, kờñ yal kòn in git lài do anih do, nàng tơnơ̆ do tŭ ală kòn bơsram tus den geh git krơi is”.

Tàm pang sră cih jơnau kơlôi sơnơng den geh uă ngan jơnau cih tơlik nùs nhơm kờñ gơboh mờ Bác Hồ mờ añ dan yal ờ uă gơl cih bè do: “Ơ wa, do là dơ̆ sơnrờp kòn geh tus tàm anih ơhò ơm Nhà Rồng, ngoh rơngăc ngan mờ mùl màl pơnyờ să ngan tài ală broă mờ Wa neh lơh ai bol kòn in. Kòn mờ ală bơyô geh rài rài kah ưn ngài Wa mờ geh lơh ngan bơsram, lơh jăt ơnà jăk Wa dê”.

Gam dùl nă bơyô là cau pa gơs cau bơsram dờng bơh càr Khánh Hoà tus còp Bảo tàng den cih: “Dơ̆ sơnrờp tơnơ̆ mờ 18 nam kis tàm càr Khánh Hoà, kòn bal mờ ală bơyô geh tus còp Bảo tàng Hồ Chí Minh mờ là cau pa gơs cau bơsram dờng dê tàm ƀòn dờng geh măt sơnđan Wa dê. Tus tàm anih do, nùs nhơm kòn gơlơh ngoh rơngăc ngan, bol kòn dan ưn ngài broă lơh dờng màng bal mờ broă phi să bơh Wa dê ai dà lơgar in”.

Mờ bơta kuơ bè rài kah yau pơgồp bal mờ rài lơh broă kăc màng bơh Chủ tịch Hồ Chí Minh dê, Bến Nhà Rồng, Bảo tàng Hồ Chí Minh-Tàm ƀòn dờng Hồ Chí Minh neh gơs rùp rài bơh ƀòn dờng sơnđan măt Bác Hồ mờ là bơta pơnyờ să ngan bơh làng bol gùt lơgar dê. Bơh tàm anih do, Bác Hồ neh sơn đờm broă lòt gùng 30 nam nàng jòi “Khăt gơboh ai làng bol añ in, Lơngăp lơngai is ai Dà lơgar añ in”.

Cau mblàng Ndong Brawl