VOV4.K’ho- Drim ngai 06/12, Thủ tướng Chính phủ ồng Phạm Minh Chính tus bal mờ đơs đơng lam tàm Cribơyai kuang bàng kấp dờng màng pah nam dơ̆ 3 bè công nghiệp 4.0 mờ tơngume “Bơtàu tơnguh wơl mờ bơtàu tơnguh lơh sa- mpồl bơtiàn kơ̆ kơljap tơngai tơnơ̆ kòp Covid-19 mờ chồl pràn lơh sa mờ măi mok, tam gơl pa dà lơgar tàm rài lơh sa sồ” jat broă lơh pơgồp bal đah pơrjum tơn mờ pơrjum pờ tơn tàm internet bơh Ban Kinh tế dà lơgar đơng lam.

Cribơyai công nghiệp 4.0

Cribơyai kuang bàng kấp dờng màng dơ̆ do là broă geh kuơ dờng màng ngan bè chính trị, lơh sa- mpồl bơtiàn, pơgồp bơnah lam lơh jat Nghị quyết pơrjum dờng cau ala mat gùt lơgar dơ̆ 13 bơh Đảng dê mờ yal jơnau cribơyai cơng tàng ai broă bơt bơtàu broă lơh lơh sa mờ măi mok, tam gơl pa dà lơgar tơngai tus nam 2030, broă wèt sền tus nam 2045. Mờ kung là broă lơh ngan ngồn drơng broă ai tơlik gùng dà, broă rơndap lơh mờ broă lơh bơtàu tơnguh wơl, bơtàu tơnguh lơh sa- mpồl bơtiàn tơngai tơnơ̆ kòp Covid-19 jat Jơnau đơs pơn dut bơh Pơrjum Đảng dà lơgar dơ̆ 4 khóa 13 dê mờ jơnau đơng lam bơh Thủ tướng Chính phủ dê.

Cau mblàng K’Duẩn