VOV4.K’ho-Ngai 27/4, Bộ trưởng Ngoại giao lơgar Việt Nam ồng Bùi Thanh Sơn neh geh dơ̆ cribơyai tàm điện thoại mờ  Bộ trưởng Ngoại giao lơgar Nga  ồng Sergei Lavrov. Tàm dơ̆ cribơyai tàm điện thoại, Bộ trưởng Ngoại giao lơgar Nga ồng Sergei Lavrov gờm chờ Bộ trưởng Ngoại giao ồng Buì Thanh Sơn geh pồ at gơnoar broă Bộ trưởng Ngoại giao lơgar Việt Nam dê.

 Bộ trưởng Ngoại giao lơgar Nga ồng Sergei Lavrov gờm chờ ală cồng nha lơh broă mờ lơgar ndai bơh lơgar Việt Nam dê mờ tàm tơngai pa do, tàm hơ̆ geh broă at gơnoar broă geh cồng nha gơnoar broă Chủ tịch ASEAN nam 2020 mờ Ủy viên lơgar ờ lơh broă sùm Hội đồng Bảo an Liên hợp quốc dê tơngai lơh broă bơh nam 2020-2021, đơs niam ngan gơnoar broă ngai sơlơ pơn rơ ngan bơh Việt Nam dê tàm dunia mờ tàm tiah do dê. Bàr Bộ trưởng neh bal mờ gơ̆p cribơyai bè bơta lơh broă bal Việt Nam mờ Nga, ngan là lơh broă bal rcang sơn dră kòp Covid-19 kung bè lơh broă bal đah 2 Bộ Ngoại giao dê, bơta pơgồp bal đah 2 lơgar tàm ală dơ̆ pơrjum uă lơgar, tàm hơ̆ geh Hội đồng Bảo an Liên hợp quốc mờ tàm ASEAN. Bàr Bộ trưởng tơngŏ bơta kơ̆p kờñ tơnguh lam lơh niam ală broă lơh tàm tơngume Nam tàm pơgơl Việt Nam mờ Nga tàm nam 2021.

Cau mblàng K’ Hạnh