VOV4.K’ho- Drim ngai 15/6, tàm Hà Nội, Bộ Nông nghiệp mờ Phát triển Nông thôn pơgồp bal mờ ala mat ală Bộ: Ngoại giao, Y tế, Tài nguyên mờ Môi trường, Công thương, Kế hoạch mờ Đầu tư, Liên hợp quốc tàm Việt Nam mờ ală mpồl lơh broă bal dunia, ală viện kơlôi sơnơng, hìu bơsram đại học, ală mpồl lơh sa kă bro, hiệp hội mờ ală gah geh gơ rềng, bơyai lơh cribơyai dà lơgar dơ̆ 1 tàm Hà Nội. Do là broă kuơmàng nàng kờñ rơcang lài ai lơgar Việt Nam in tus bal pơrjum dờng màng bơh ală mpồl lơh broă kòi phe- phan sa bơh Liên hợp quốc dê geh bơyai lơh tàm nhai 9 nam do.

Pơrjum dờng màng nam 2021 bơh Liên hợp quốc dê kờñ ai tơlik lài gùng dà ai ală mpồl lơh broă kòi phe- phan sa geh bơtàu tơnguh kơ̆ kơljap rlau, tơl làm rlau mờ geh bơta pràn kong jai niam rlau, lơh gơlik bơta gơ rềng uă gah nàng lơh geh ală jơnau kờñ bơtàu tơnguh kơ̆ kơljap tàm nam 2030. Pơrjum tơrgùm tă pơgồp jơnau đơs tàm jơnau kờñ lơh broă, geh: gàr gơnoar geh ngui kòi phe- phan sa ờdo ờdă mờ ring bal bơta pràn ai tơl nă cau in; tam gơl jơnau kờñ ngui sa jat gùng dà niam bơnĕ mờ kơ̆ kơljap; tơnguh broă lơh sa rềp mềr mờ tiah ơm kis; sơlơ tơnguh bơta ring bal tàm broă tam pà bơta kuơ mờ broă lơh, bơt bơtàu bơta pràn kong jai tềng đap ală bơta aniai mờ bơta ờ niam.

Cau mblàng K’Duẩn