VOV4.K’ho- Mho ngai 13/12, tàm Hìu duh broă Củ tịc, Củ tịc lơgar ồng Nguyễn Xuân Phúc wă rò 60 nă cau ala măt pơnrơ jak ala măt ai ală kuang bàng lòt Pơrjum dờng cau ala măt Cau ùr Mpồl ling klàng dơ̆ VII pa tơn jơh geh cồng nha tàm Hà Nội. Đơs tàm dơ̆ tìp măt, Củ tịc lơgar jờng rơ cau ùr Mpồl ling klàng sùm lơh ngan sơrlèt gan kal ke, lơh gơs jak ngan kơnòl broă geh jàu, mơkung lơh niam gơnoar broă cau ùr dê, là cau gàr ồs lơngăp lơngai chờ hờp chờ hờn hìu bơnhă dê. Cau ùr Mpồl ling klàng mùl màl là ală cau “Jak broă dà lơgar, lơh sir niam broă hìu”.

Mờ rlau 90 rbô nă kuang bàng, cau tàm mpồl mờ rlau 2 rbô mpồl kấp hơđơm, cau ùr Mpồl ling klàng gam geh mat tàm jơh ală broă lơh anih lơh broă, tàm jơh ală gah broă lơh, lơh pôs đồng tàm làm gùt ù tiah bơh Dà lơgar dê. Bulah tàm anih lơi, tàm gơnoar broă lơi, Cau ùr Mpồl ling klàng sùm lơh jăt niam ală nùs nhơm niam bơnĕ bơh Cau ling Wa Hồ dê. Kuơmàng, tơngai bơh nam 2016- 2021 dơ̆ sơnrờp geh 41 nă kuang bàng, cau ùr tàm Mpồl ling klàng tus bal tàm mpồl ling sền gàr ring lơngai bơh Liên hợp quôk dê. Tàm broă rơcăng sơndră kòp Kovid-19 neh geh 1 rbô 700 nă cau ùr tàm mpồl ling klàng dan lòt lơh broă tàm tiah lam lài tam dră mờ kòp.

Cau mblàng Lơ Mu K’Yến