VOV4.K’ho - Dờp jơnau jà bơh bơtau lơgar Campuchia, ồng Norodom Sihamoni, Củ tịc lơgar ồng Nguyễn Xuân Phúc còp kấp dà lơgar tus lơgar Campuchia bơh ngai 21 tus 22 nhai 12. Do là dơ̆ tus còp lơgar Campuchia sơnrờp ngan tàm gơnoar broă Củ tịc lơgar bơh Củ tịc lơgar ồng Nguyễn Xuân Phúc dê mờ kung là dùl tàm ală broă lơh sơnrờp ngan nàng sơn đờm ai ală broă lơh chờ gờm “Nam git gơ̆p Việt Nam mờ Campuchia, Campuchia mờ Việt Nam” mờ tơnkah 55 nam crơng gơs broă lơh bal đah bàr lơgar. Lơgar Việt Nam mờ lơgar Campuchia geh broă lơh git gơ̆p rềp bal niam bơnĕ; lơh bơyô bal ờs mờng; lơh broă bal tơl ală bơta kơl jăp, jŏ jòng. Tàm bơta bàr lơgar gam bơyai lơh uă broă tơnkah ală bơta tơngŏ kuơ màng tàm broă lơh git gơ̆p đah bàr lơgar, dơ̆ tus còp lơgar Campuchia dơ̆ do bơh Củ tịc lơgar geh pơn jăt tai ai tơngŏ Đảng, Dà lơgar bal mờ làng bol lơgar Việt Nam geh sền kuơ ngan broă lơh git gơ̆p mờ lơgar Campuchia.

Cau mblàng Ndong Brawl