VOV4.K’ho- Kung tàm mho ngai 21/12, tàm dơ̆ lòt còp kấp dà lơgar tus lơgar Campuchia, Củ tịc lơgar ồng Nguyễn Xuân Phúc neh geh dơ̆ cribơyai broă mờ Củ tịc Quôk hội lơgar Campuchia ồng Heng Samrin. Tàm dơ̆ cribơyai broă, bàr nă kwang đơng lam bồ đơs sùm, Việt Nam mờ Campuchia là lơgar ơm rềp bal, geh bơhiàn tam klăc bal, tàm kờñ bal mờ tàm dong kờl bal mờ gơ̆p, là bơta pơñiờ să mờ là jơtài kas màng ngan bơh bàr jơi bơtiàn dê mờ ală rơnàng tơnơ̆ do bơh 2 lơgar dê pal pơn jăt tai gàr sùm, sền gàr mờ lơh jăt niam.

Bàr gah dùl nùs ring bal tàm tơngai tus geh lơh sùm ală dơ̆ tìp măt, cribơyai kwang bàng kấp dờng màng mờ ală kấp lơh sùm tàm jơh ală gah broă; sơlơ cribơyai bơta mờng chài kung bè bơyai lơh ală dơ̆ tìp măt lơh kwèng bal đah ală nghị sĩ, mpồl nghị sĩ lơh bơyô bal, mpồl ùr kwang bàng Quôk hội, mpồl kwang bàng Quôk hội kơnòm să bàr lơgar; pơn jăt tai lơh jăt niam gơnoar broă bơh Quôk hội 2 lơgar dê tàm broă tơnguh bơta gĭt gơ̆p bàr gah; pơn jăt tai pơgồp bal niam, tàm dong kờl bal mờ gơ̆p tàm ală dơ̆ pơrjum nghị viện kơnhoàl ù tiah do mờ dunia bè AIPA, Mpồl tam klăc Nghị viện dunia, Pơrjum Nghị viện câu Á- Thái Bình Dương.

Cau mblàng Lơ Mu K’Yến