VOV4.K’ho- Pơn jat tai dơ̆ lòt còp kấp dà lơgar tus lơgar Campuchia, ngai 22/12, Củ tịc lơgar ồng Nguyễn Xuân Phúc neh tus còp, boh bơr mờ kuang bàng, cau lơh broă Đại sứ quán Việt Nam tàm Campuchia, tìp mat ala mat mpồl cau Viẹet Nam tàm Campuchia. Chờ gờp tìp wơl làng bol tàm dơ̆ tìp mat, Củ tịc lơgar ồng Nguyễn Xuân Phúc đơs wơl tàm tŭ tơngai kal ke bơh kòp Kovid-19 dê, Việt Nam mờ Campuchia neh geh uă broă lơh tàm dong kờl bal mờ gơp. Do là nùs nhơm pal ki ngàm ngan, pơn jat tai ai tơnggŏ git gơp ờs mờng niam bơnĕ, kơ̆ kơljap jŏ jòng đah 2 lơgar mờ làng bol 2 lơgar.

Tàm tơngai tus, Củ tịc lơgar ồng Nguyễn Xuân Phúc sồr kuang bàng, cau lơh broă Đại sứ quán pơn jat tai lam lơh niam kơnòl broă mờ Đảng, dà lơgar jàu, lơh niam kơnòl broă sền gàr, dong kờl làng bol, dong kờl rài kis ai làng bol Việt Nam kis tàm lơgar ndai in nàng ngai sơlơ geh uă rlau tai ală broă lơh ngan ngồn bơh làng bol dê wèt rê hờ tơngu rơyas, tă pơgồp bơt bơtàu ƀòn tờm, dà lơgar, tàm hơ̆ geh broă bơsong gơnoar adat boh lam ai cau jơi Việt Nam tàm lơgar Campuchia in.

Cau mblàng K’Duẩn