VOV4.K’ho- Gơ ơm tàm dùl ròt ală broă lơh tơngkah kir sơnrai 60 nam Ngai Bác Hồ rê còp ƀòn tờm dơ̆ 2 (08/12/1961- 08/12/2021), ngai 12/12, tàm Tiah Tềl lời wơl Kim Liên, xã Kim Liên, kơnhoàl Nam Đàn, càr Nghệ An yŭ rơyùm bơyai lơh Dơ̆ tơngkah kir sơnrai 60 nam Ƀác Hồ rê còp ƀòn tờm dơ̆ 2 mờ sơnđờm ai ngui Hìu kah kơlôi Củ tịc Hồ Chí Minh tàm ƀlàng Tiah tềl lời wơl. Đơs tàm dơ̆ bơyai lơh, Củ tịc lơgar ồng Nguyễn Xuân Phúc pà gĭt, jơh dùl rài kis lơh broă kăc màng, Ƀác Hồ neh tài bơh kơn jơ̆ kơnòl mờ dà lơgar lời wơl dùl broă kơnòl broă tàm hìu tàm ƀòn lơgar.

Lòt ngài bơh ƀòn tờm bơh nam 1906 tus dì tŭ gơ gơs là cau lam bồ Đảng mờ Dà lơgar, Ƀác Hồ mìng rê còp ƀòn geh 2 dơ̆ lơm, mơya Ồng kung gam pơyua jơh nùs nhơm kah kờñ bơh ală pang sră pơyua, jơnau cih pơyua tus hờ ƀòn tờm, ală dơ̆ tơm bơh bơr tơn rềp mềl ngan mờ làng bol mờ kwang bàng mờ đảng viên càr Nghệ An. Củ tịc lơgar đơs nền, Đảng, Dà lơgar mờ làng bol he kung sùm sùm cih kah dà kơlhề dờng ngan bơh ală cau mè cau bèp dê, bơh hìu bơnhă mờ ală jơi nòi đah bèp, đah mè bơh Ồng dê neh deh ròng mờ bơto bơtê cau kòn pơnrơ ngan jak chài ngan bơh jơi bơtiàn Việt Nam dê- Củ tịc Hồ Cí Miñ kờñ gơboh ngan.

Cau mblàng Lơ Mu K’Yến