VOV4.K’ho- Mang ngai 28/12, tàm ƀòn dờng Tam Kỳ, Củ tịc lơgar ồng Nguyễn Xuân Phúc tus bal Dơ̆ tơngkah kir sơnrai sơnđan măt Quảng Nam (1471- 2021). Đơs tàm dơ̆ bơyai lơh, Củ tịc lơgar ồng Nguyễn Xuân Phúc pà gĭt, pơgăp mờ do 550 nam, Bơtau Lê Thánh Tôn neh sơnđan mat ai ù tiah Quảng Nam in, tàm hơ̆ geh pe nơm gơlăng: Thăng Hoa, Tư Nghĩa mờ Hoài Nhơn. Den tàng bè hơ̆, broă lơh ngai do ờ mìng geh kwơ gơwèt mờ Quảng Nam lơm mờ gam gơwèt jơh bal mờ Đà Nẵng, Quảng Ngãi, Bình Định mờ jơh ù tiah tàm gùl lơgar sơl. Quảng Nam, măt hòi bềng bơta gơtha tơngŏ bơta sền sơnơng ngài jrô ơnàng làm uă bè ù tiah dà lơgar Việt Nam he kung bè bơta gơn kơnờm ngan jơi bơtiàn dờng pràn.

Lài hơ̆, tàm mho ngai 28/12, Củ tịc lơgar ồng Nguyễn Xuân Phúc tìp măt mờ ală kwang bàng lài do là Tỉnh ủy viên bơh nam 1997 tus tŭ do. Yal bàr pe bơta lòng mờ càr Quảng Nam tŭ do bè broă lơh sa gam dềt, priă lơh geh kờp bal dùl nă cau lơyah rlau pơndrờm mờ kờp bal bơh gùt lơgar dê, gùng lòt gam kal ke; khà hìu rƀah gam uă bal mờ 4,25%, bơta jak mpồl cau lơh broă gam ờ hềt uă, Củ tịc lơgar ồng Nguyễn Xuân Phúc sồr: Pal geh dùl jơnau kơ̆p kờñ, dùl jơnau gơn kơnờm bơh cau Quảng Nam dê tàm tơngai tus.

Cau mblàng Lơ Mu K’Yến