VOV4.K’ho - Ngai òr (09/01), Mpồl cau cih văn Việt Nam bơyai lơh pơrjum lam sồr Dơ̆ lam sồr bơceh văn học bè tơngu me kơnòm dềt. Đơs tàm dơ̆ lam sồr, Củ tịc lơgar ồng Nguyễn Xuân Phúc đơs niam Mpồl cau cih văn Việt Nam bơyai lơh dơ̆ lam sồr bơh ceh văn học bè tơngu me kơnòm dềt mờ đơs là, do là broă lơh geh kuơ màng ngan.

Tài văn học là bơta tờm ròng nùs nhơm wèt hờ bơta niam, bơta toh glài, geh uă nùs nhơm dong kờl bal; mờ bơ̆t bơtàu bồ tơngoh ngăc ngar, bơta pràn kơl dang brồ guh bơh kòn bơnus dê, tàm hơ̆ uă ngan là gơwèt mờ rơnàng kơnòm să, ơruh pơnu, kơnòm pa tào, kơnòm dềt. Củ tịc Mpồl cau cih văn Việt Nam ồng Nguyễn Quang Thiều pà git, Dơ̆ lam sồr bơceh văn học bè tơngu me kơnòm dềt geh lơh tàm 5 nam (bơh tŭ do tus nhai 5 nam 2025) mờ bàr tơngu me văn xuôi mờ jơnau nrĭ. Cau geh tus bal pơrlòng geh jơh ală làng bol lơgar Việt Nam tàm lơgar mờ lơgar bơdìh. Mpồl bơyai lơh geh lam sồr ngan broă tus bal bơh ală ơruh pơnu, kơnòm pa tào mờ kơnòm dềt. Dơ̆ jào khà dơ̆ 1 kờp dŭ geh bơyai lơh di tàm satềp Trung thu nam 2023.

Cau mblàng Ndong Brawl