VOV4.K’ho- Ngai 28/12, tàm Đà Nẵng, Củ tịc lơgar ồng Nguyễn Xuân Phúc tus bal cribơyai Ƀòn dờng Đà Nẵng: Cồng nha mờ bơta kơp kơnờm. Jat jơnau yal bơh ƀòn dờng dê, bơh tŭ gơ gơs là ƀòn dờng gơ wèt dà lơgar tàm nam 1977 tus tŭ do, Đà Nẵng neh gơ gơs là tiah lam lài lơh sa bơh tiah tàm gùl lơgar dê. Ală cồng nha tơnơ̆ 25 nam do là bơta tam gơl pràn kơldang ngan, lơh sa gơguh jơnhua sùm. Tŭ ờ hềt gơtìp kal ke tài bơh kòp bơtờp, nam 2019, broă lơh sa bơh ƀòn dờng Đà Nẵng dê geh mờr 69 rbô 500 tơmàn đong, priă lơh geh kờp bal tàm dùl nă cau rlau 97 tơlak đong dùl nam. Bulah gơtìp kal ke tài bơh kòp Kovid-19, nam do, broă lơh sa bơh ƀòn dờng dê kờp dŭ geh mờr 64 rbô tơmàn đong. Ƀòn dờng kung neh geh bơta tam gơl pràn kơldang ngan nàng bơtàu tơnguh.

Đơs tàm dơ̆ cribơyai, Củ tịc lơgar tơngkah ƀòn dờng Đà Nẵng ờ gŏ di gờñ hừh nùs mờ pal tơrgùm uă ai bơtàu tơnguh cau lơh broă nàng drơng bơtàu tơnguh. Đà Nẵng pal bơtàu tơnguh gơs tiah tờm kă bro dunia, anih tus gơ kờñ ngan bơh ală cau bơcri priă, nac nhơl chờ dê; là dùl bơta pơn jờng, là tiah lam lài ờ mìng bè khà gơguh lơh sa bơh gùt lơgar dê, mờ gam là dùl rùp pơn rơ mờ bơta pơn iờ să bè bơta brồ guh sơrlèt gan kal ke, kòl yan, bơtàu tơnguh geh cồng nha bơh Việt Nam dê.

Cau mblàng K’Duẩn