VOV4.K’ho- Di dơ̆ Việt Nam lơh gơs geh cồng nha tơngai lơh broă Ủy viên ờ lơh broă sùm Hội đồng Ƀảo an Liên hợp quôk bơh nam 2020 tus nam 2021, Củ tịc lơgar ồng Nguyễn Xuân Phúc pa geh jơnau đơs pơyua kuơmàng ngan, tàm hơ̆ đơs nền Việt Nam pa pin dờn, rơcang àñ ơnòng uă kơnòl broă kuơmàng dunia dê tài ring lơngai mờ bơtàu tơnguh kơ̆ kơljap.

Tơnguh bơta ƀuơn mờ bơta pràn pa bơh dà lơgar dê, mờ bơta lơh ngan dờng ngan, Việt Nam neh tus bal rơcang lài mờ jơh nùs, ai tơlik uă jơnau bơceh pa, tă pơgồp ngan ngồn tàm broă lơh bơh Hội đồng Ƀảo an dê, mờ jơnau đơs pơyua sùm là “Lơgar lơh broă bal tài ring lơngai kơ̆ kơljap” tàm jòi broă lơh kơryan, bơsong tam lơh, tơrbŏ bal lơh bal Hội đồng Ƀảo an mờ mpồl ASEAN, sơndră mờ ală bơta lòng gơ wèt tus mờ ring lơngai mờ lơngap lơngai dunia, jat bơnàng jă lơh jat Hiến cương Liên hợp quôk mờ adat boh lam dunia. Broă lơh hơ̆ kung ai tơnggŏ rùp hin bơh dùl Việt Nam ngac ngar, tam gơl pa mờ jơnau đơs pơyua pràn kơldăng bè broă wèt sền, bơta kơp kơnờm bơtàu tơnguh dà lơgar pràn kơldăng, pas sơm tus nam 2045 neh ai tơlik tàm Pơrjum dờng Đảng dơ̆ 13. At tê bal mờ mpồl bơtiàn dunia tŭ do, là dùl Việt Nam pa  pin dờn, rơcang àñ ơnòng uă kơnòl broă dờng màng dunia dê tài ring lơngai mờ bơtàu tơnguh kơ̆ kơljap.

Cau mblàng K’Duẩn