VOV4.K’ho- Di tơngkah kir sơnrai 30 nam ngai sơn tờm lơgar Kazakhstan (16/12/1991- 16/12/2021), ala mat Quôk hội Việt Nam mờ să tờm is he dê, Củ tịc Quôk hội ồng Vương Đình Huệ neh pơyua sră nting bơr gờm chờ tus ồng Maulen Ashimbayev, Củ tịc Thượng viện mờ ồng Nurlan Nigmatulin, Củ tịc Hạ viện lơgar Kazakhstan.

Tàm ală sră pơyua nting bơr gờm chờ, Củ tịc Quôk hội chờ hờp sền gŏ tàm ală nam do, git gơp lơh bơyô ờs mờng mờ lơh broă bal uă gah đah Việt Nam mờ Kazakhstan mờ git gơp lơh broă bal đah Quôk hội 2 lơgar ngai sơlơ geh gàr kơ̆ mờ bơtàu tơnguh. Củ tịc Quôk hội pin dờn là, tàm tơngai tus geh pơn jat tai lơh broă bal jơh nùs mờ Củ tịc Thượng viện mờ Củ tịc Hạ viện lơgar Kazakhstan nàng kờñ tơnguh git gơp lơh bơyô mờ lơh broă bal niam bơnĕ đah Việt Nam mờ Kazakhstan tài bơta kuơ bơh làng bol 2 lơgar dê, tài ring lơngai, kơ̆ kơljap, lơh broă bal, bơtàu tơnguh tàm tiah do mờ tàm dunia.

Cau mblàng K’Duẩn