VOV4.K’ho - Di tàm dơ̆ còp mùl màl lơgar Ấn Độ, Củ tịc Quốk hội ồng Vương Đình Huệ bal mờ mpồl kuang bàng ala măt dờng màng Quốk hội lơgar he còp kuang bàng, cau lơh broă tàm Đại sứ quán lơgar Việt Nam tàm lơgar Ấn Độ, tìp mờ mpồl cau lơgar Việt Nam kis tàm lơgar Ấn Độ.

Boh bơr mờ kuang bàng, cau lơh broă tàm Đại sứ quán lơgar Việt Nam tàm lơgar Ấn Độ, mpồl cau lơgar Việt Nam kis tàm lơgar Ấn Độ, Củ tịc Quốk hội ồng Vương Đình Huệ đơs, làng bol là cau pròc mhàm ờ gơtùi tam cah is, tàm hơ̆ kuơ màng ngan là mờ broă Tam klăc bal jơi bơtiàn kòn cau bơh Đảng mờ Dà lơgar he dê jăt Nghị kuyết sồ 36 mờ Cỉ thị sồ 45 bơh Ƀộ Cíñ trị bè broă cau lơgar Việt Nam kis hờ lơgar bơdìh. Tàm tơngai tus, Quốk hội, Cíñ phủ geh đơng lam ală anih lơh broă gơrềng bal lơh gơs adăt boh lam, lơh niam wơl sră nggal, ai geh tơngu me adăt boh lam ring bal, ndrờm bal ai broă lơh jăt mờ sền gròi lơh jăt adăt boh lam bè cau lơgar Việt Nam kis hờ lơgar bơdìh. Củ tịc Quốk hội kơ̆p kờñ, tàm tơngai tus geh sền ală broă lơh pràn pa tàm broă lơh git gơ̆p đah bàr lơgar, kung bè sền ală cồng nha dờng màng rơlao bơh ală kuang bàng, cau lơh broă tàm sứ quán kung bè làng bol lơgar he tàm lơgar Ấn Độ dê.

Cau mblàng Ndong Brawl