VOV4.K’ho- Mho ngai 15/12, jat jơ tiah do, Củ tịc Quôk hội ồng Vương Đình Huệ mờ Mpồl kuang bàng dờng màng Quôk hội lơgar he neh tus ƀlàng rơndeh par ling klàng Palam, New Delhi, sơn đờm dơ̆ lòt còp ngan ngồn lơgar Ấn Độ jat jơnau jà bơh Củ tịc Hạ viên lơgar Ấn Độ ồng Om Birla mờ Củ tịc Thượng viện lơgar Ấn Độ ồng Venkaiah Naidu, bơh ngai 15 tus ngai 19/12/2021. Rò mpồl lòt còp tàm ƀlàng rơndeh par rê tus lơgar Ấn Độ geh: Kuang atbồ Ủy ban Lơh broă mờ lơgar ndai bơh 2 viện Quôk hội Ấn Độ ồng Shri P P Chaudhary bal mờ 2, 3 nă Thượng nghị sỹ, Hạ nghị sĩ, kuang đơng lam bồ cơldŭ lơh broă Quôk hội, kuang bàng drơng broă wă nac cơldŭ lơh broă Quôk hội Ấn Độ.

Tàm dơ̆ lòt còp ngan ngồn lơgar Ấn Độ dơ̆ do, Củ tịc Quôk hội ồng Vương Đình Huệ geh tìp mat cribơyai broă mờ Củ tịc Hạ viện Ấn Độ, tìp mat cribơyai broă mờ Củ tịc Thượng viện, Phó Kuang atbồ lơgar Ấn Độ, Thủ tướng lơgar Ấn Độ, wă Tổng Bí thư Đảng Cộng sản lơgar Ấn Độ, tus bal tơngkah kir sơnrai 5 nam git gơp lơh broă bal jŏ jòng tơl làm Việt Nam- Ấn Độ, lòt còp ràng tơlik rùp 50 nam git gơp lơh broă bal 2 lơgar Việt Nam- Ấn Độ, wă kuang đơng lam bồ ală mpồl git gơp mờ bơyô Việt Nam dê, tus bal Cribơyai mpồl lơh sa kă bro.

Cau mblàng K’Duẩn