VOV4.K’ho - Pơn jăt tai dơ̆ tus còp mùl màl lơgar Ấn Độ, mang òr (16/12), jăt jơ tàm tiah do, tàm càr lơgar New Dehli, Củ tịc Quôk hội ồng Vương Đình Huệ neh cri bơyai mờ Củ tịc Hạ viện lơgar Ấn Độ ồng Om Birla.

Tàm dơ̆ cri bơyai, Củ tịc Quôk hội ồng Vương Đình Huệ tơlik nùs nhơm chờ hờp tŭ broă lơh git gơ̆p jŏ jòng tơl ală bơta đah lơgar Việt Nam mờ lơgar Ấn Độ neh rơlao 5 nam mờ gam pơn jăt tai tơnguh bơtàu pràn kơl dang tàm ală gah broă, tàm hơ̆ uă ngan là cíñ trị lơh broă bal mờ lơgar ndai, sền gàr bơta lơngăp lơngai dà lơgar, kă bro, bơta chài rơgơi mờ tìp bal làng bol; dan bàr lơgar pơn jăt tai pơgồp bal nền nòn lơh jăt broă lơh tơngai bơh nam 2021 tus 2023 nàng cèng geh ală bơta kuơ mùl màl, geh cồng nha ai Cíñ phủ mờ làng bol đah bàr lơgar in. Di tàm dơ̆ do, Củ tịc Quôk hội ồng Vương Đình Huệ ưn ngài broă dong kờl kuơ màng bơh lơgar Ấn Độ ai lơgar Việt Nam in tàm broă rơcang sơndră mờ kòp Kovid-19; pơn jờng ală mpồl lơh sa kă bro lơgar Ấn Độ chồl pràn broă bơcri priă tàm lơgar Việt Nam ală gah broă mờ lơgar Ấn Độ geh bơta pràn.

Cau mblàng Ndong Brawl