VOV4.K’ho- Tàm mho ngai 13/12/2021, tàm Hìu Quôk hội lơgar Hàn Quôk, càr lơgar Seoul, dơ̆ bơyai lơh wă rò Củ tịc Quôk hội Việt Nam ồng Vương Đình Huệ mờ Mpồl kwang bàng ala măt kấp dờng màng Quôk hội Việt Nam neh geh lơh yŭ rơyùm bơh bơta đơng lam bơh Củ tịc Quôk hội Hàn Quốc ồng Park Byeong Seug dê. Tơnơ̆ dơ̆ bơyai lơh wă rò tơn, Củ tịc Quôk hội ồng Vương Đình Huệ mờ Củ tịc Quốc hội Hàn Quôk ồng Park Byeong Seug bal mờ Mpồl kwang bàng ala măt kấp dờng màng Quôk hội bơh 2 lơgar dê bơyai lơh cribơyai.

Bàr nă kwang đơng lam bồ đơs nền bulah kòp dờng Kovid-19 gơbàn kal ke mơya bơta gĭt gơ̆p đah 2 lơgar dê pơn jăt tai gàr sùm gùng dà bơtàu tơnguh tàm uă gah broă, kuơmàng là lơh broă bal ciñ trị, lơh sa, lơngăp lơngai, sền gàr dà lơgar mờ tìp măt lơh quèng bal đah làng bol 2 lơgar dê. Bàr gah ring bal broă tơnguh broă gĭt gơ̆p đah 2 lơgar tus “Tam klăc lơh broă bal jŏ jòng tơl ală bơta đah Việt Nam mờ Hàn Quôk” di dơ̆ tơngkah kir sơnrai 30 nam 2 lơgar gĭt gơ̆p lơh broă bal đah Việt Nam mờ Hàn Quôk. Củ tịc Quôk hội Việt Nam ồng Vương Đình Huệ kơ̆p kờñ Hàn Quôk tam pà bal mờng chài bơtàu tơnguh lơh sa, tàm hơ̆ geh bơtàu tơnguh tơlir, tam gơl pa bơceh pa. Bàr gah ring bal lơh ngan lơh geh jơnau kờñ tơnguh priă lơh geh bơh kă bro đah 2 lơgar tus khà 100 tơmàn dolar Mỹ tàm nam 2023 mờ 150 tơmàn dolar Mỹ tàm nam 2030.

Cau mblàng Lơ Mu K’Yến