VOV4.K’ho- Pơn jat tai ală broă lơh tàm dơ̆ lòt còp ngan ngồn lơgar Hàn Quôk, Củ tịc Quôk hội ồng Vương Đình Huệ neh tus bal Cribơyai kơƀàng wil mờ ală Tập đoàn dờng bơh lơgar Hàn Quôk dê bơh Kong ti Kim&Chang bơyai lơh. Đơs tàm dơ̆ cribơyai, Củ tịc Quôk hội ồng Vương Đình Huệ đơs nền, git gơp đah Việt Nam mờ Hàn Quôk gam ơm tàm tơngai bơtàu tơnguh niam ngan rlau jơh mờ gam rơcang tơngkah kir sơnrai 30 nam ngai crơng gơs git gơp lơh broă bal tàm nam 2022. Tàm dơ̆ lòt còp do, Củ tịc Quôk hội ồng Vương Đình Huệ pà git, neh sền broă kĭ mờ jàu 27 sră cơng tàng, ală jơnau ring bal bơcri priă đah ală mpồl lơh sa kă bro, ală tiah đah 2 lơgar kờp priă mờr 10 tơmàn dolar Mỹ, hơ pơrgon geh cèng wơl bơta pràn pa ai broă lơh bơcri priă, kă bro bal đah 2 lơgar tàm tŭ tơngai pa.

Tàm dơ̆ cribơyai, ala mat ală mpồl lơh sa kă bro bơh lơgar Hàn Quôk dê neh ai tơlik jơnau sồr chồl pràn tac phe hờ lơgar ndai dong Việt Nam; kờñ jòi git bè broă rơndap lơh bơh lơgar Việt Nam dê gơ wèt tus mờ bơtàu tơnguh oto đèng; sồr Việt Nam lam lơh mờ geh tus bal tàm gah mobile money, ngân hàng sồ; sền sơ wì tơrmù dia geh lơh nền lài, geh broă lơh ai càn priă gơ hòi gơ jà mut tàm tiah ƀòn lơgar, bơtàu tơnguh lơh sa ƀòn lơgar, hợp tak xã.

Cau mblàng K’Duẩn