VOV4.K’ho- Drim ngai 13/12, jat jơ tiah do, tàm dơ̆ lòt còp ngan ngồn lơgar Hàn Quôk, Củ tịc Quôk hội ồng Vương Đình Huệ neh wă kuang đơng lam bồ ală Tập đoàn, mpồl lơh sa kă bro khà dùl lơgar Hàn Quôk dê. Tàm dơ̆ wă ală Tập đoàn, Củ tịc Quôk hội ồng Vương Đình Huệ đơs nền, Việt Nam mờ Hàn Quôk gam lơh ngan lam git gơp 2 lơgar guh tus dùl khà pa di tơngkah kir sơnrai 30 nam ngai crơng gơs git gơp lơh broă bal. Lơh broă bal lơh sa là gah tờm ngan den tàng tàm dơ̆ lòt còp do ai gŏ bơta lơh ngan kờñ tơnguh lơh broă bal lơh sa, kă bro 2 lơgar geh 100 tơmàn dolar Mỹ tàm nam 2023.

Tàm dơ̆ wă kuang đơng lam Tập đoàn Samsung Electronics, Củ tịc Quôk hội ồng Vương Đình Huệ pà git, Việt Nam kờñ broă rơndap lơh rề ơnàng bơcri priă kă bro bơh Kong ti dê tàm tơngai mờr tus; đơs niam broă rơndap lơh dong kờl mpồl lơh sa kă bro Việt Nam tus bal tàm ròt mpồl tac phan gùt plai ù bơh Samsung dê; mờ kung sồr Kong ti geh broă rơndap lơh mờ broă lơh ngan ngồn nàng dong kờl ală mpồl lơh sa kă bro tơnguh pràn jak lơh sa mờ tàm pơrlòng nàng tơl pràn jak tus bal tàm ròt mpồl tac phan gùt plai ù bơh Tập đoàn Samsung dê mờ Kong ti dê đơs is.

Cau mblàng K’Duẩn