VOV4.K’ho- Tàm càr lơgar New Dehli, Củ tịc Quôk hội ồng Vương Đình Huệ neh wă Ƀộ trưởng Ngoại giao lơgar Ấn Độ ồng Jaisankar. Tàm dơ̆ wă, Củ tịc Quôk hội ồng Vương Đình Huệ đơs nền, Việt Nam sùm sền dờng màng git gơp lơh broă bal jŏ jòng tơl làm mờ lơgar Ấn Độ, jờng rơ Ấn Độ sền Việt Nam là lơgar lài ngan tàm broă lam lơh wèt hờ tiah đah mat tơngai lik he dê.

2 gah ring bal đơs, git gơp lơh broă bal jŏ jòng tơl làm đah Việt Nam mờ Ấn Độ gam bơtàu tơnguh niam ngan tàm jơh ală gah broă lơh tờm geh cíñ trị- lơh broă mờ lơgar ndai, sền gàr lơngap lơngai- sền gàr dà lơgar, lơh sa- kă bro- bơcri priă, khoa học kông nghệ, niam chài, tàp pràn să jan, nhơl chờ, tìp mat lơh quèng làng bol. 2 nă kuang đơng lam bồ neh cribơyai bè 2, 3 broă tàm tiah do, tàm dunia mờ jơh bal 2 gah sền gròi bal, tàm hơ̆ geh git gơp đah mpồl ASEAN mờ lơgar Ấn Độ mờ broă rềp ndo tàm dà lềng đah mat tơngai lik, đơs nền Việt Nam mờ Ấn Độ geh pơn jat tai kờñ ală broă lơh ngan chồl pràn broă bơsong tơl bơta ờ ring bal bơh ală broă lơh ring lơngai, di mờ Adat boh lam dunia, tài ring lơngai, lơh broă bal kơ̆ kơljap mờ bơtàu tơnguh tàm tiah do mờ tàm dunia.

Cau mblàng K’Duẩn