VOV4.K’ho- Tàm dơ̆ lòt còp ngan ngồn lơgar Hàn Quôk, drim ngai 15/12,  Củ tịc Quôk hội ồng Vương Đình Huệ wă Củ tịc mờ là Kuang atbồ dờng Tập đoàn Amkor Technology ồng Ji Jong-rip mờ Củ tịc Tập đoàn tài cíñ Hana ồng Kim Jung-tai, Do là 2 broă lơh dut ndơl, tơn jơh niam bơnĕ dơ̆ lòt còp ngan ngồn lơgar Hàn Quôk bơh Củ tịc Quôk hội ồng Vương Đình Huệ dê mờ Mpồl kuang bàng dờng màng Quôk hội Việt Nam dê.

Tàm dơ̆ lơh broă mờ Tập đoàn Amkor Technology, Củ tịc Quôk hội ồng Vương Đình Huệ nting bơr gờm chờ Tập đoàn geh jàu sră cơng tàng cih mat bơcri priă Rơndap broă lơh hìu măi crăp mờ tơrlòng lào phan bơna bán dẫn tàm càr Bắc Ninh mờ khà bơcri gơguh tus 1 tơmàn 600 tơlak dolar Mỹ. Củ tịc Quôk hội ồng Vương Đình Huệ đơs nền, Việt Nam kờñ mờ hơ pơrgon geh lòt bal mờ Tập đoàn Amkor Technology tàm broă lam lơh mờ pơlam ngui rơndap broă, lơh gơlik bơta ƀuơn nàng Tập đoàn in bơcri priă bơtàu tơnguh kă bro kơ̆ kơljap tàm lơgar Việt Nam.

Tàm dơ̆ wă Tập đoàn Tài cíñ Hana, Củ tịc Quôk hội ồng Vương Đình Huệ sồr Hanabank pơn jat tai tam pà mờng chài đơng pơlam pa, ală broă lơh kă bro pa jat tàm bơnàng jă kong nghệ, tơnguh ală mpồl lơh broă bal bơh lơgar Hàn Quôk dê rề ơnàng bơcri priă tàm lơgar Việt Nam.

Cau mblàng K’Duẩn