VOV4.K’ho- Mho ngai 17/12, tàm Hìu duh broă Mpồl duh broă gĭt gơ̆p lơh broă mờ lơgar ndai lơgar Ấn Độ dê, Củ tịc Quôk hội Việt Nam ồng Vương Đình Huệ mờ Mpồl ala măt Kuang bàng kấp dờng màng lơgar Việt Nam neh tus bal Dơ̆ bơyai lơh tơngkah kir sơnrai lơh gĭt gơ̆p Tam klăc lơh broă bal Jŏ jòng Tơl ală bơta đah Việt Nam mờ Ấn Độ. Ƀộ trưởng Ƀộ Ngoại giao lơgar Ấn Độ đơs nền, Việt Nam mờ Ấn Độ geh nùs nhơm lơh bơyô bal kơ̆ kơl jăp ngan, sùm tàm pin dờn bal mờ gơ̆p, bơta gĭt gơ̆p bơtàu tơnguh tàm uă gah broă lơh bulah uă bơta kal ke kòl yan, bơta lòng. Bàr lơgar gam uă bơta pràn jak lơh broă bal tàm ală gah broă lơh jak chài, măy mok.

Bàr lơgar kung neh lơh broă bal ngan ngồn tàm ală gah broă ờs mờng bơh yau, bè: niam chài, bơto bơtê mờ gĭt gơ̆p lơh kwèng bal đah làng bol. Đơs tàm Dơ̆ bơyai lơh, Củ tịc Quôk hội Việt Nam ồng Vương Đình Huệ sồr 2 lơgar tàm tơngai tus pơgồp bal jơh nùs lơh jăt niam Broă lơh lơh broă nam 2021- 2023 lam lơh jăt bơta gĭt gơ̆p tam klăc lơh broă bal jŏ jòng tơl ală bơta mờ Bơta sền sơnơng bal bè Ring lơngai, Pas gơs mờ làng bol neh geh ring bal tàm nhai 12/2020 nàng sùm sơlơ tơnguh rlau tai bơta gĭt gơ̆p niam bơnĕ tŭ do đah 2 lơgar.

Cau mblàng Lơ Mu K’Yến