VOV4.K’ho- Mang ngai 05/01, tàm Hà Nội, Anih sơñio rùp Quôk hội Việt Nam bơyai lơh Dơ̆ tơngkah kir sơnrai 07 nam ngai pờ tơlik jơnau đơs sơñio rùp bơh sơnrờp (06/01/2015- 06/01/2022) mờ Tơlik măt Mpồl lơh broă sồ. Củ tịc Quôk hội ồng Vương Đình Huệ, Phó Củ tịc duh broă sùm Quôk hội ồng Trần Thanh Mẫn tus bal Dơ̆ tơngkah kir sơnrai.

Đơs tàm dơ̆ bơyai lơh tơngkah kir sơnrai, Củ tịc Quôk hội ồng Vương Đình Huệ kơ̆p kờñ, Sơñio rùp Quôk hội Việt Nam pơn jăt tai đòm jăt bơngă, gơnoar broă bơh dùl Gah sơñio rùp kwơmàng pal geh bơh dà lơgar dê sùm tam gơl pa, bơtàu tơnguh jơh bal bè bơta jak mờ bơta niam, ngan ngồn là  rbàng tàm tơrbŏ pin dờn đah Quôk hội mờ cau tĕ khà mờ làng bol gùt lơgar, nàng “cau tĕ khà tàm tiah lơi, Sơñio rùp Quôk hội Việt Nam ơm tàm hơ̆”.

Di tàm dơ̆ do, Sơñio rùp Quôk hội Việt Nam neh tơlik măt Mpồl lơh broă sồ jăt tàm bơnàng jă internet tàm anih quochoitv.vn. Do geh gơn kơnờm geh gơ gơs là anih tờm tơngume sồ bè ală broă lơh bơh Quôk hội dê, kwang bàng đơng lam bồ Quôk hội mờ bơh ală anih lơh broă gơwèt Quôk hội dê, bơh ală kwang bàng Quôk hội dê; là bơnàng jă bơh tàm tơrbŏ dê, tàm pơgồp mờ bơceh pa tơngume drơng cau tĕ khà tàm gùt lơgar in.

Cau mblàng Lơ Mu K’Yến