VOV4.K’ho- Mho ngai 19/9 jat jơ tiah do, hơ̆ là drim ngai 20/9 jat jơ Việt Nam tàm Hìu kac màng càr lơgar La Habana, Bí thư dơ̆ dùl Ban Chấp hành Đảng Cộng sản dà lơgar Cuba, Chủ tịch lơgar Cuba ồng Miguel Díaz-Canel neh đơng lam dơ̆ wă rò yŭ rơyùm Chủ tịch lơgar ồng Nguyễn Xuân Phúc. Tơnơ̆ dơ̆ rò ngan ngồn, Chủ tịch lơgar ồng Nguyễn Xuân Phúc mờ Bí thư dơ̆ dùl Ban Chấp hành Đảng Cộng sản dà lơgar Cuba, Chủ tịch lơgar Cuba ồng Miguel Díaz-Canel neh lam bồ mpồl kuang bàng dờng màng 2 lơgar bơyai lơh tìp mat cribơyai.

Tàm dơ̆ tìp mat cribơyai, 2 nă kuang đơng lam bồ ring bal tŭ tơngai tus 2 gah pal pơn jat tai sơlơ tơnguh git gơp chính trị bơh broă cribơyai broă Mpồl kuang bàng ală kấp, gàr sùm, ngac ngar, tơnguh cồng nha ală cơ chế lơh broă bal, geh Pơrjum cribơyai lý luận đah 2 Đảng, Ủy ban 2 Chính phủ, lùp sền chính trị đah 2 Bộ Ngoại giao, cribơyai broă lơh đah 2 Bộ Quốc phòng.

Chủ tịch lơgar ồng Nguyễn Xuân Phúc jơh nùs ưn ngài ală kuang đơng lam bồ dờng màng, Bộ Y tế mờ gah sinh dược lơgar Cuba bulah ờ hềt lơh gơs broă cit sơnơm vaccine tàm lơgar mơya neh tam pà mờ ai lài uă ngan rlau jơh nàng tac, tàm jàu công nghệ lơh gơlik sơnơm vaccine rơcang sơndră kòp Covid-19 bơh lơgar Cuba dê ai lơgar Việt Nam in. Do là dùl cơng tàng niam ngan ai bơta tò dong di tŭ mờ Cuba sùm lời ai Việt Nam in bè jơnau đơs bơh Kuang đơng lam bồ Cuba ồng Fidel Castro dê “Tài Việt Nam, Cuba tŭ lơi kung rơcang tă pơgồp jơh bal mhàm he dê”.

Cau mblàng K’Duẩn