VOV4.K’ho- Chủ tịch lơgar ồng Nguyễn Xuân Phúc neh geh dơ̆ cribơyai tàm điện thoại mờ Bí thư dơ̆ dùl Ban Chấp hành Đảng Cộng sản dà lơgar Cuba, Chủ tịch lơgar Cuba ồng Miguel Díaz Canel cribơyai bè gùng dà, broă lơh pơn jat tai sơlơ tơnguh git gơp lơh bơyô ờs mờng kuơmàng đah 2 Đảng, 2 dà lơgar mờ làng bol 2 lơgar.

Chủ tịch lơgar ồng Nguyễn Xuân Phúc ai tơnggŏ bơta chờ hờp dơ̆ sơn rờp cribơyai tàm điện thoại mờ ồng Miguel Díaz Canel tàm gơnoar broă pa; đơs git gơp lơh broă bal đah 2 lơgar pơn jat tai bơtàu tơnguh pràn kơldang bulah geh kòp dờng. 2 nă kuang đơng lam bồ neh đơs nền bơta tam klac ờ gơtùi tam gơl đah Việt Nam mờ Cuba, nùs nhơm tŭ lơi kung dong kờl bal mờ gơp tàm khat dùl bơta lơi, ring bal sơlơ tam klac mờ cribơyai mờng chài tàm broă bơt bơtàu Chủ nghĩa xã hội tàm jơh bal 2 lơgar.

Chủ tịch lơgar Cuba ồng Miguel Díaz Canel đơs nền, Cuba geh jơh nùs sền dờng màng lơh broă bal sơnơm vaccine mờ Việt Nam, lơh ngan bơh tŭ do tus lồi nam 2021 ai khà uă ngan sơnơm vaccine Abdala rơcang sơndră kòp Covid-19 bơh lơgar Cuba dê mờ rơcang ai cau jak chài tus tàm jàu công nghệ lơh gơlik sơnơm vaccine ai lơgar Việt Nam in.

Cau mblàng K’Duẩn