VOV4.K’ho - Lơh jăt Nghị định sồ 55 nam 2015 bơh Chính phủ bè broă ai càn priă drơng broă tơnguh bơtàu lơh sa suơn sre, ƀòn lơgar, bơh nam 2015 tus tŭ do, ală mpồl ai càn priă tàm kơnhoàl 30a Dak Glong, càr Dak Nông lơh jăt ală broă ai càn priă sa priă cồng ờ uă ai làng bol bơcri priă tàm broă ròng phan, tam phan tơnguh bơtàu broă lơh sa.

Bơh 6 nam lơh jăt, kơnờm mờ broă ngui geh cồng nha priă càn tàm broă lơh sa, kă bro, uă broă lơh sa ai geh gĭt nđờ rơhiang tơlăk đong pah nam, bơh tŭ hơ̆ dong kờl làng bol klàs mờ rơƀah.

Hìu nhă ồng K’ Soạn (kòn cau Mạ) kis tàm ƀòn 9, xã Quảng Khê, kơnhoàl Dak Glong, càr Dak Nông geh 5 lồ suơn kơphe tam bơrlŭ bal mờ tờm sầu riêng mờ tờm ƀơ. Ồng K’ Soạn pà gĭt: nam lài suơn tam phan hìu nhă ồng tơnhào geh rơlao 9 tấn gar kơphe, 8 tấn plai ƀơ mờ di pơgăp 20 tấn plai sầu riêng. Ờ kờp ală khà priă bơcri tàm broă lơh, hìu nhă gam geh priă cồng mờr 200 tơlăk đong.

Kuang bàng Ngân hàng bơto sồr làng bol tàm broă ngui priă càn sa priă cồng ờ uă geh cồng nha

Geh priă bè tŭ do là kơnờm mờ broă ngui geh cồng nha priă càn bơcri tàm broă lơh sa bơh Ngân hàng Nông nghiệp mờ Phát triển Nông thôn kơnhoàl Dak Glong dê. “Lài do, hìu nhă añ là hìu rơƀah tàm ƀòn. Nam 2016, Ngân hàng Agribank tàm kơnhoàl Dak Glong ai hìu nhă in càn 70 tơlăk đong, bơcri tàm broă blơi phơng, sơnơm sền gàr phan tam nàng sền gàr mờ tơnguh bơtàu suơn kơphe. Tơnơ̆ mờ tŭ tơnhào kơphe, priă cồng geh pơgồp bal mờ priă prăp tàm hìu nhă dê den geh bơcri tai tàm broă blơi 300 tờm ƀơ, 300 tờm sầu riêng nàng tam. Tus tŭ do priă geh bơh tơnhào kơphe, sầu riêng mờ ƀơ di pơgăp 350 tơlăk đong tàm 1 nam, tơnơ̆ mờ tŭ neh kờp jơh ală khà priă bơcri den priă cồng gam 180 tơlăk đong”.

Gam ồng K’ Lem kung kis tàm ƀòn 9, xã Quảng Khê sơl yal: bồ nam 2016, ồng geh Ngân hàng Nông nghiệp mờ Phát triển Nông thôn kơnhoàl Dak Glong ai càn 120 tơlăk đong. Jơh ală khà priă do geh bơcri tàm broă blơi phơng sih, sơnơm sền gàr phan tam nàng sền gàr 4 lồ kơphe mờ blơi 4 nơm kơnrồ me. Priă geh bơh broă tơnhào kơphe mờ tăc be, bal mờ khà priă càn tai hìu nhă bơcri tàm broă blơi măi chŏ, cò ù.

Tus tŭ do, bơta kuơ geh bơh broă ròng phan, tam phan mờ kă bro măi chŏ, cò ù pah nam geh rơlao 500 tơmàn đong. Ồng K’ Lem đơs: kơnờm mờ Ngân hàng den tàng hìu nhă ồng neh klàs mờ rơƀah. “Tàm broă càn priă, ngân hàng ai tơl bơta niam nàng càn geh priă mhar, ƀuơn. Tŭ càn geh priă den hìu nhă blơi phơng sih nàng sền gàr suơn kơphe, blơi kơnrồ me nàng ròng. Hơ̆ sồng priă geh bơh tơnhào kơphe, kơnrồ deh kòn, hìu nhă blơi tai dùl nơm măi nàng chŏ, cò ù ơpah làng bol in. Tŭ do pah nam priă cồng là rơlao 400 tơlăk đong. Priă jơnkah tàm ală nam do hìu nhă ngui nàng lơh hìu geh di pơgăp 450 tơlăk đong, priă gam tai lời ròng ală oh kòn lòt bơsram mờ bơcri tai tàm broă lơh sa”.

Quảng Khê là xã tiah ngài kơnhoàl Dak Glong dê. Gùt xã geh 3 rơbô hìu, rơlao 13 rơbô nă làng bol, mờ 27 jơi bơtiàn kòn cau ơm kis bal. Khà hìu rơƀah tàm do ală nam lài sùm geh tàm khà uă.

 Ngui priă càn geh cồng nha, ồng K' Lem ờ mìng klàs mờ rơƀah mờ gam lơh hìu mờr 500 tơlăk đong

Ồng Trần Ngọc Thuận, Phó Chủ tịch UBND xã Quảng Khê pà gĭt, lơh jăt Nghị định sồ 55 nam 2015 bơh Chính phủ, ală mpồl ai càn priă, tàm hơ̆ geh Ngân hàng Nông nghiệp mờ Phát triển Nông thôn kơnhoàl Dak Glong pơgồp bal mờ UBND xã lơh jăt ală khà priă càn sa priă cồng ờ uă nàng dong kờl làng bol tơnguh bơtàu broă lơh sa tơn jơh jơgloh tơmù rơƀah.

Bơh tŭ hơ̆, geh dong kờl khà hìu rơƀah gơmù pah nam, khà broă priă geh tàm broă bơ̆t bơtàu ƀòn lơgar pa xã dê geh lơh gơs, xã kung neh lơh gơs broă bơ̆t bơtàu ƀòn lơgar pa tàm lồi nam 2020 pa do. “Khà hìu rơƀah bơh xã Quảng Khê nam 2011 tŭ ờ hềt bơ̆t bơtàu ƀòn lơgar pa tus rơlao 500%, tus nam 2019 gam rơlao 27%, mơya tus nam 2020 den khà do gơmù mìng gam 5,7% (hơ̆ là hờ đơm 7% jăt khà geh ai tàm broă bơ̆t bơtàu ƀòn lơgar pa dê). Bơh tŭ hơ̆ dong kờl xã Quảng Khê lơh gơs khà broă bè priă geh mờ lơh gơs broă bơ̆t bơtàu ƀòn lơgar pa. Hơ̆ là cồng nha bơh broă geh càn priă sa priă cồng ờ uă, ƀuơn tàm broă dong kờl tơnguh bơtàu broă lơh sa suơn sre, ƀòn lơgar bơh ală mpồl ai càn priă jăt gùng dà broă lơh bơh Nghị định sồ 55 bơh Chính phủ dê”.

Jăt ồng Nguyễn Xuân Hưng, Phó kuang atbồ Ngân hàng Nông nghiệp mờ Phát triển Nông thôn kơnhoàl Dak Glong yal, bơh nam 2015 tus tŭ do, lơh jăt gùng dà broă lơh bơh Chính phủ mờ Ngân hàng cấp hờ đang dê, Ngân hàng do neh lơh jăt tus mờ ală mpồl ai càn priă tàm ală xã kơnhoàl Dak Glong dê, ai càn ală khà priă sa priă cồng ờ uă di jăt mờ Nghị định sồ 55 bơh Chính phủ nàng làng bol tơnguh bơtàu broă lơh sa, tơn jơh jơgloh tơmù rơƀah.

Bal mờ broă lơh mhar, niam mờ geh cồng nha ală sră nggal càn priă, gàr niam loh làng, ring bal; den Ngân hàng gam ai kuang bàng drơng broă do tus tàm ală ƀòn nàng lam sồr, sền gròi làng bol ngui priă càn di mờ broă lơh, geh cồng nha. Den tàng, bơta niam broă ai càn priă sùm geh lơh niam, di mờ gùng dà broă lơh bơh Chính phủ neh ai tơlĭk. Bơh tŭ hơ̆, ală hìu làng bol ƀuơn rơlao tàm broă geh càn priă tơnguh bơtàu broă lơh sa, kă bro. “Tơngai do, Ngân hàng kơnhoàl neh crơng gơs rơlao 100 mpồl ai càn priă tàm 7 xã tàm kơnhoàl Dak Glong dê, khà priă jơnkah dồs rơlao 900 tơmàn đong ai mờr 3 rơbô nă cau tàm ală xã tàm kơnhoàl in càn. Broă ai càn priă bol añ geh lơh mhar, geh cồng nha ai làng bol in; ală khà priă càn geh sa priă cồng ờ uă di jăt mờ kơrnoăt Nghị định sồ 55 nam 2015 bơh Chính phủ dê.

Tŭ geh priă làng bol bơcri tàm broă tơnguh bơtàu ală broă ròng phan, tam phan mờ kă bro geh priă cồng niam, bơh tŭ hơ̆ geh tơn jơh jơgloh tơmù rơƀah, dong kờl ală xã lơh gơs khà broă bè priă geh nàng pơgồp bal tàm broă bơ̆t bơtàu ƀòn lơgar pa ai ală xã in”.

Kơnờm mờ broă lơh jăt ndrờm bal broă ai càn priă bơh Ngân hàng Nông nghiệp mờ Phát triển Nông thôn kơnhoàl Dak Glong dê tàm ală nam do, neh ai geh bơnàng jă nàng dong kờl làng bol kis ală xã tàm kơnhoàl geh tơl priă nàng tơnguh bơtàu broă lơh sa. Bal mờ ală bơta pràn ndai, priă càn bơh ngân hàng neh pơgồp bal kuơ màng tàm broă lơh jăt broă tơmù rơƀah kơl jăp tàm kơnhoàl dê, dong kờl ală xã lơh gơs broă bơ̆t bơtàu ƀòn lơgar pa.

Cau cih Tuấn Long-Cau mblàng Ndong Brawl