VOV4.K’ho- Lơh jat jơnau sồr bơh Tập đoàn Ồs đèng Việt Nam (EVN), tàm 2 nhai, nhai 7 mờ nhai 8 nam 2021, Công ty Ồs đèng Dăk Lăk lơh jat broă tơrmù priă đèng ai mờr 150 rơbô nă năc ngui đèng tàm kơnhoàl Cư Kuiñ mờ ƀòn dờng Buôn Ma Thuột in, ală tiah pal lơh jat broă ai ơm yah ngài mpồl bơtiàn jat Chỉ thị sồ 16 bơh Chính phủ dê nàng rcang sơndră kòp Covid-19. Tàm dơ̆ 4 do, Công ty Ồs đèng Dăk Lăk lơh jat broă lơh dong kờl rlau 12 tơmàn 500 tơlak đong lơh jat broă tơrmù priă đèng, tơrmù priă đèng ai cau ngui in. Jat hơ̆, khà tơrmù ngan ngồn: tơrmù 15% priă đèng (ờ hềt kờp khà priă tơnguh tai VAT) tàm sră yal priă đèng ai cau ngui đèng in tus 200 kWh dùl nhai; tơrmù 10% priă đèng (ờ hềt kờp khà priă tơnguh tai VAT) tàm sră yal priă đèng ai cau ngui đèng rlau 200 kWh dùl nhai in.

Dăk Lăk: 150 rơbô nă năc ngui đèng ai ơm yah ngài mpồl bơtiàn jat Chỉ thị sồ 16 geh tơrmù 12 tơmàn 500 tơlak đong priă đèng

Ồng Hà Văn Chương-Phó Kuang atbồ Công ty Ồs đèng Dăk Lăk pà gĭt, lơh jat broă ai ơm yah ngài mpồl bơtiàn rcang sơndră kòp Covid-19 jat Chỉ thị sồ 16 bơh Thủ tướng Chính phủ dê, tơl nă cau ndrờm pal ơm tàm hìu den jơnau kờñ ngui đèng pah ngai gơguh uă. Broă tơrmù priă đèng ai năc ngui đèng in là bơta kờñ pal geh tàm tơngai kòp gam bơtờp uă. Mpồl lơh broă gam mhar ngan pơgồp bal mờ anih lơh broă geh gơnoar cih mat năc ngui đèng nàng dong kờl tơrmù priă đèng jat jơnau sồr.

Cau mblàng K’Hạnh