VOV4.K’ho- Mho ngai 6/7, Mpồl cau ùr Kuang àng càr Dak Lak pơgồp bal mờ bàr pe nă cau geh nùs nhơm niam tàm ƀòn dờng Buôn Ma Thuột, bơyai lơh tă pơgồp dong kờl 20 tấn phan bơna, tàm hơ̆ geh: biăp, phe, plai chi... pơndiang tus tàm ƀòn dờng Hồ Chí Minh dong kờl làng bol gam ơm kis tàm ală tiah, anih ai ơm yah ngài kòp Covid-19.

 20 tấn phan ngui sa kờñ pal geh tus mờ ală tiah ai ơm yah ngài tơrgùm bal tàm ƀòn dờng  Hồ Chí Minh

20 tấn phan bơna do geh jun tus Hìu sơnơm Quân y 175 tàm quận Gò Vấp mờ bàr pe hìu bềp trŭ sa tơrgùm bal tàm ală tiah ai ơm yah ngài tàm bàr pe quận, kơnhoàl bơh ƀòn dờng Hồ Chí Minh dê. Tàm tơngai drà tờm Bình Điền, drà dờng ngan rlau jơh ƀòn dờng dê pal ơm lơh broă nàng lam lơh broă lơh rcang sơndră kòp, den oh mi tàm Mpồl cau ùr Kuang àng càr dê bal mờ ală cau geh nùs nhơm niam kơ̆p kờñ ngan, bơta tă pơgồp bal bulah dềt rơhền, kung pơgồp bơnah pơndờm pơnđiang làng bol tàm ƀòn dờng Hồ Chí Minh sơr lèt gan kal ke. Tơngai tus, Mpồl cau ùr Kuang àng càr Dak Lak pơn jat tai hòi jà tă pơgồp bal ală phan bơna ngui sa kờñ pal geh nàng pơyoa tus ală tiah, anih ai ơm yah ngài tơrgùm bal tàm ƀòn dờng Hồ Chí Minh in.

Cau mblàng K’Hạnh