VOV4.K’ho - Lơh jăt jơnau đơng lam bơh Ngân hàng Dà lơgar pơn jăt tai lơh jăt ală broă dong kờl, bơsong kal ke ai cau càn priă in gơtìp aniai bơh kòp Covid-19, bơh ngai 16 nhai 6 nam 2021, Agribank tơnguh uă rơlao bàr dơ̆ khà priă ai càn sa priă cồng ờ uă gơwèt mờ cau càn priă gơtìp aniai bơh kòp Covid-19 tus 200 rơbô tơmàn đong nàng dong kờl cau càn tơmù kal ke, ring niam broă lơh sa kă bro, gàr niam rài kis broă lơh sa mpồl bơtiàn.

Suơn kơphe tam wơl ơnàng 1 lồ bơh bi Lê Đức Anh (mpồl 5 Công ty kơphe D’Rao, kơnhoàl Cư̆ Mgar, càr Dak Lak) neh mŭt tàm nam dơ̆ 8, sơn đờm tàm tơngai geh plai uă ngan. Ală tờm kơphe neh tìm ntê jơh mờ geh uă plai.

Kuang bàng lơh broă tàm ngân hàng Agribank tus dong kờl làng bol lơh sră tơmù khà priă cồng tài gơtìp bơh kòp Covid-19

Bi Đức Anh pà gĭt: lài do bi neh rồ tờm kơphe kra, nàng lời ù rơlô tàm 2 nam di jăt mờ broă lơh kờñ tam pa wơl kơphe dê, tơnơ̆ mờ hơ̆, hơ̆ sồng geh tam wơl. Kơnờm mờ broă rơwah sơntìl niam, lơh jăt di mờ ală broă sơnka sền gàr den tàng suơn kơphe geh hòn gơs niam. Ờ di bè uă tiah ndai, tờm kơphe gơtìp chơ̆t tài uă bơta tu, kòp tơnơ̆ mờ tŭ tam 2, 3 nam. “Tam pa wơl kơphe den tơnơ̆ mờ dùl tơngai lời ìs ù, tam phan ờ jŏ tơngai nàng lơh pa ù mờ añ tam wơl kơphe den geh cồng nha uă rơlao. Tŭ ờ hềt tam pa wơl, tŭ kơphe neh kra den dùl lồ mìng tơnhào geh bơh 7 tus 8 tấn. Tŭ neh tam pa wơl den geh tàm bơh 15 tus 17 tấn, di lah geh tơnhào den uă rơlao. Suơn kơphe do 1 lồ, geh 17 tấn”.

Ồng Nguyễn Hữu Thọ, Kuang atbồ Công ty kơphe D’rao pà gĭt: Công ty geh 488 lồ kơphe, bơh nam 2010 tus tŭ do neh lơh jăt broă tam pa wơl 298 lồ, geh rơlao 60% khà bă ù. Khà priă tă tàm broă tam pa wơl là rơlao 33 tơmàn đong. Jơh ală ndrờm geh Ngân hàng Nông nghiệp mờ Phát triển Nông thôn tàm kơnhoàl Cư̆ Mgar ai càn mờ sa priă cồng ờ uă. Bơh bồ nam 2020 tus tŭ do, tài khà priă tơl kĭ kơphe kas rơlao mờ khà priă tăc den tàng Công ty neh tìp uă ngan kal ke.

                           Dong kờl mpồl lơh sa kă bro hìu bơsram mầm non tư thục....

Bơta ndai tai, geh rơlao 65% tàm khà 435 nă công nhân lơh broă tàm Công ty là cau kòn cau, rài kis broă lơh sa gam uă kal ke; jơh ală cau ndrờm càn priă mờ ngân hàng nàng bơcri tàm broă lơh sa mờ geh priă ngui sa tàm rài kis. Tàm khà priă jơnkah dồs rơlao 41 tơmàn đơng tŭ do bơh Công ty dê, jơh ală ndrờm càn tàm ngân hàng Nông nghiệp mờ Phát triển Nông thôn kơnhoàl. Bơh tŭ gơtìp kòp Covid-19 gơbàn, Công ty neh geh ngân hàng lời ing dồs mờ tơmù priă cồng. Bơta do neh dong kờl Công ty, cau lơh broă gơmù ờ uă kal ke. “Nông nghiệp mờ Phát triển Nông thôn dong kờl ai Công ty in tàm bơta là tơmù priă cồng, tơmù jơh ală priă cồng bơh ală khà priă ai càn. Bơh 9,5 gơmù gam 9% den jơh ală ndrờm geh tơmù jơh bơh 8,5 hơ̆ sồng 7,5 mờ 6,5 den tàng kung gơmù kal ke bè priă cồng ai công ty in tàm 6 nhai bồ nam 2021. Bơh nam 2020 ngân hàng neh sền wơl mờ tơmù tus jơh nam 2021. Den priă cồng hơ̆ kung geh dong kờl ai công ty in uă ngan nàng bơsong broă kal ke tàm tơngai do”.

Lơh jăt jơnau đơng lam bơh Chính phủ - Ngân hàng Dà lơgar Việt Nam - Ngân hàng Agribank đah tô Dak Lak gam lơh jăt broă dong kờl cau càn priă tơmù priă cồng tài gơtìp bơh kòp Covid-19

Ồng Lê Hồng Phong là cua lơh sa kă bro bơcri priă lơh hìu bơsram Mầm non tư thục Phong Lan, tàm thị trấn Quảng Phú, kơnhoàl Cư̆ Mgar neh rơlao 10 nam do. Bơh tŭ gơtìp kòp Covid-19 gơbàn, geh tŭ hìu bơsram pal til mpồng pah nhai tơn. Tŭ do, pah ngai mìng geh rò 70 nă kơnòm bơsram, ndrờm mờ 1 bơnah 4 pơn drờm mờ bè ờs. 13 nă cau pơgru pal tam pơdar bal ơm ờ lòt bơto. Hìu bơsram tư thục, den tàng cau pơgru ơm ờ lòt bơto kung ndrờm mờ broă gơtìp koh priă nhai. Ồng Phong pà gĭt: Mpồl lơh sa kă bro ồng dê kung geh ngân hàng tơmù priă cồng sơl. “Ngân hàng hòi mpồl lơh sa kă bro tus mờ lùp bè bơta kal ke bè lơi? Mờ mìng ai mpồl lơh sa kă bro in rê cih jơnau yal. Ngân hàng kung ai geh bơta niam càn priă sa priă cồng ờ uă. Bơta tŭ do den añ kờñ ngân hàng sa priă cồng ờ uă rơlao tai tàm dơ̆ gơtìp kòp do, mờ ai tơnjŏ tơngai tơm priă tờm. Dơ̆ bàr tai là di lah gơtùi den dong kờl hìu bơsram in geh càn dùl khà priă nàng tơm priă nhai, dong kờl cau pơgru tàm kàl gơtìp kòp do”.

Ồng Nguyễn Quang Vinh, Phó kuang atbồ ngân hàng Nông nghiệp mờ Phát triển Nông thôn đah tô càr Dak Lak pà gĭt: “Tàm tơngai 2 nam pa do gơtìp kòp Covid-19 den ngân hàng Agribank đah tô càr Dak Lak neh dong kờl ai cau càn priă in tơmù kal ke mờ brồ guh lơh sa kă bro bè tơnơ̆ do: lơh wơl tơngai tơm dồs, tơmù ha là ờ sa priă cồng mờ gàr bè ờs mpồl dồs là 2 rơbô 277 nă cau càn, mờ khà jơnkah dồs là 451 tơmàn đong. Ai càn sa priă cồng ờ uă 735 tơmàn đong, mờ khà priă bơcri là 337 tơmàn đong, tàm hơ̆ geh 19 mpồl lơh sa kă bro mờ khà priă bơcri 144 tơmàn đong. Tơmù ha là ờ sa priă cồng gơwèt mờ cau càn lài do mờ khà priă cồng geh tơmù bơh 1 tus 3% jăt mờ tơl nă cau càn priă. Bơh tŭ gơtìp kòp tus tŭ do, den ngân hàng Agribank đah tô càr Dak Lak neh lơh gơs sră nggal ai 31 rơbô 500 nă cau càn priă in, mờ khà priă ai càn là 16 rơbô 320 tơmàn đong. Den ngân hàng Agribank đah tô càr Dak Lak neh pơgồp bal tàm broă tam pà bal kal ke kung bè dong kờl cau càn priă in sơrlèt mờ kal ke nàng ring niam broă lơh sa mờ tơnguh bơtàu broă lơh sa”.

Cau mblàng Ndong Brawl