VOV4.K’ho-UBND kơnhoàl Ea H’leo, càr Dăk Lăk neh ai ơm ing broă lơh Chủ tịch mờ Phó Chủ tịch UBND xã Ea Nam tài bơh lơh ờ jơh nùs, ờ rcang sền ngăc broă sơndră kòp. Kờp tus ngai 5/9, kơnhoàl Ea H’leo sền gŏ 112 nă cau bơtờp kòp Covid-19, mìng is tàm xã Ea Nam neh geh tus 73 nă cau kòp, gơ gơs tiah bơtờp kòp uă ngan bơh kơnhoàl Ea H’leo dê.

Jat ală Quyết định sồ 2906 mờ 2908, Chủ tịch UBND kơnhoàl Ea H’leo ai ơm ing lơh broă gơwèt mờ Chủ tịch UBND xã Ea Nam ồng Nguyễn Văn Nhiệm mờ Phó chủ tịch xã ồng Kpă Y Chức tơngai lơh broă bơh nam 2021-2026. Tơngai ai ơm ing lơh broă là 15 ngai nàng sền sơwì, lơh loh kơnòl broă bơh cau atbồ tàm broă lơh rcang sơndră kòp Covid-19 tàm ù tiah xã Ea Nam dê. Xã Ea Nam neh lời làng bol bơyai lơh dơ̆ tơ̆p ƀồc, tơrgùm uă cau, lơh tìs mờ Chỉ thị sồ 15 bơh Thủ tướng Chính phủ dê, lơh bơtờp kòp tàm mpồl bơtiàn. Tàm tơngai ai ơm ing lơh broă Chủ tịch UBND xã Ea Nam ồng Nguyễn Văn Nhiệm geh kơnòl tàm jàu wơl jơh ală broă lơh ai ồng Nguyễn Văn Tiến, Phó Chủ tịch UBND xã dê in.

Cau mblàng K’Hạnh