VOV4.K’ho- Tàm càr Dak Lak, tŭ do geh mờr 4 rbô nă cau ùr lơh sơnơm, điều dưỡng mờ y, bác sĩ. Tàm dơ̆ sơndră mờ kòp Covid-19, pal kong tơn mờ bơta ngòt rơngơt, bơh ală cau lơh kơnòl broă sac rơ wah mpồl bơtiàn halà tàm ală cơldŭ xét nghiệm halà gròi sền tơn cau kòp Covid-19... khi sùm tă pơgồp jơh pràn kơldăng să jan, bồ tơngoh jak, lời jơh broă is he dê nàng kơ̆ nùs tàm mpồl lam lài.

Rê wơl tơnơ̆ rlau 1 nhai tus bal lơh broă dong kờl is mut tàm ƀòn dờng Hồ Chí Minh sơndră kòp Covid-19, bác sĩ Trần Thị Lệ, Khoa ung bướu, hìu sơnơm dờng tiah Tây Nguyên kung ờ hềt jơh gơ tơngòr tàm nùs sơl. Anih mờ bi lơh broă là anih sơm cau kòp Covid-19 in tàm Khoa kòp nhiệt đới, hìu sơnơm Chợ Rẫy. Bơta gơ jă gơ jal bơh ală y bác sĩ dê nàng lơh ngan pìt wơl rài kis dềt rơhền ngan ală cau kòp in, ală sap tă nhơm kơn jơ̆ kơn jut bơh cau kòp dê bơrlŭ bal mờ sap ntas tít tít bơh ală măi Ecmo dê... bè ală gơl lơma kup lơyài geh bi yal wơl: “Bơta moat jrùm gơlik geh pah ngai kung uă ngan, tơl nă cau kòp chơt să tàm tŭ bol hi neh lơh ngan nàng sơm den bơh ală dơ̆ bè hơ̆, bol hi kung gơ lơh jê nùs ngan, mơya bol hi kung gam lơh ngan, dilah tŭ do cau kòp neh bè hơ̆ mờ he lời nùs nhơm ờ kơ̆ dơn tai den bơta pràn sơm kòp ờ geh cồng nha den tàng bol hi lơh ngan sơrlèt gan nàng sơm cau kòp in. Bơdìh mờ sơm kòp, bol hi gam pal tus bal tàm broă gròi sền cau kòp den tàng boh bơr mờ cau kòp rềp mềr ngan, tŭ hơ̆ ờ geh bơta tam cah ngài đah kòp Covid-19 halà bơta lơi ndai. Uă tŭ gŏ bơta cau tờm hìu bơnhă mìng ơm bơdìh hòi ală dơ̆ điện thoại mờ klo bác sĩ yal, hơ̆ là digơlan chơt halà cau kòp jroă, bác sĩ ià điện thoại kung gơ lơh jê nùs ngan ờ gơtùi đơs, mơya kung pal kong mờ bơta geh ngan gơlik geh”.

Tơngòr ală dơ̆ hòi điện thoại jê nùs mờ cau tờm bơh cau kòp Covid-19 dê

Gơ wèt mờ bi Trần Thị Thu Thủy, cau lơh xét nghiệm gơ wèt hìu sơnơm ƀòn dờng Buôn Ma Thuột den yal, bơh nhai 5 nam 2021 tus tŭ do là ală ngai kah kir ngan tàm broă lơh he dê. Rài kis hìu bơnhă, kung bè tŭ tơngai broă lơh dê ndrờm gơtìp sơrlồng sơrlàng jat broă gơlik geh bơh kòp Covid-19 dê. Ƀòn dờng sùm git gŏ ală mpồl cau bơtờp kòp tàm mpồl bơtiàn mờ sùm lơh xét nghiệm jơh gùt làng bol, ală bi sùm pal ngar mang nàng ai mẫu, jòi cau ơm rềp: “Bol hi lơh broă uă ngan, ờ geh tŭ jơ ơm rlô. Tŭ mờ kuang đơng lam bồ hòi khat tàm tŭ lơi den bol hi pal rơcang lài mơ, ai broă hìu bơnhă den bol hi rơndap sap sèng, kơlôi rơcang is”.

Bi Trần Thị Thu Thủy sap sèng niam ală phan bơna lài mờ tŭ lơh xét nghiệm mhar làng bol in

Pa hồ phan sền gàr mờ tă chèu glòm muh mat tơnơ̆ 7 jơ pơn jat sùm nggui tàm labo lơh xét nghiệm virus Sars CoV-2, bi Trần Thị Nguyên Hằng, cau lơh broă khoa xét nghiệm đal git rùp crìp gròi sền bơta pràn să jan, gơ wèt Anih tờm gròi sền kòp tê jê să càr Dăk Lăk gơ jă gơ jal soh wơl phan lơh sơnơm mơ tài dờp geh mẫu pal lơh tơn: “Lơh broă tàm gah do den he kung git tŭ ngar mang bè hơ̆ mờ lơh broă sùm bè hơ̆ den ngan là geh gơ rềng tus pràn kơldăng să jan, mơya tŭ he sền gŏ ală cau yờ kòn bơh ngài rê bòl glar bè lơi, gùng ngài mìu càl đì tàm ală rơndeh yau bè hơ̆ den ală bơta gơ rềng he dê mìng là bơta dềt rơhền lơm, ờ duh pal đơs tus. He sơnơng là bơta phi să he dê cèng wơl ring lơngai mờ iang nùs tơl nă cau in là he lơh ngan nàng sơrlèt ngan”.

Ală ùr lơh broă tàm Khoa xét nghiệm đal git rùp cùp gròi sền bơta pràn să jan, Anih tờm gròi sền kòp tê jê să càr Dăk Lăk lơh broă jơh gùt ngai tàm anih ndơp ngan

Ồng Nay Phi La, Kuang atbồ Sở Y tế càr Dăk Lăk pà git, tŭ do, mpồl lơh sơnơm càr dê geh rlau 6 rbô nă, tàm hơ̆ geh rlau 60% là cau ùr. Tàm dơ̆ sơndră mờ kòp Covid-19, ală ùr lơh sơnơm, ờ mìng jak bè mờng chài lơh broă, jơh nùs, nền nòn tàm broă lơh mờ gam tơnguh loh làng bơta lơbơn niam tŭ lơh kơnòl broă. Kơnờm geh khi, ală cau geh ai mẫu lơh xét nghiệm, ală cau kòp geh gròi sền, sơm kòp ndrờm gŏ iang nùs, rềp mềr uă rlau. Ală ngai nhai lơh kơnòl broă sơndră kòp Covid-19 gơ wèt mờ cau klau neh bòl glar ngan, gơ wèt mờ cau ùr den bơta glar bòl hơ̆ gơguh uă rlau 2 dơ̆: “Tŭ mờ oh mi cau ùr tus bal tàm broă sơndră kòp den kung geh gơ rềng tus mờng quèng tàm rài kis. Ndrờm bè khi lời jơh broă lơh gròi sền oh kòn, hìu bơnhă nàng drơng broă sơm kòp in, do là bơta pal cih dờp ngan bơh gah lơh sơnơm dê gơ wèt tus mờ oh mi cau ùr. Tàm tơngai tus, gah lơh sơnơm geh sră hòi jà ală mpồl cau, cau dùl nă să geh bơta pơn jờng ai ală oh mi cau ùr in. Tài do là ală oh mi cau ùr pal phi să uă ngan rlau jơh tàm dơ̆ bơtờp kòp Covid-19 do”.

Tàm broă lơh rơcang sơndră kòp Covid-19 gam kal ke, jŏ jòng, ală ùr y, bác sĩ kung gam ngai mang lơh ngan, kơ̆ nùs tàm mpồl lam lài bal mờ ală mpồl lơh broă kơryan kòp bơtờp nàng dờp wơl rài kis bè ờs pa ai làng bol in.

Cau mblàng K’Duẩn