VOV4.K’ho- Nàng dong kờl ai làng bol gơtìp gơrềng tài bơh kòp Covid-19, ală ngai do, uă mpồl lơh broă mờ ală mpồl cau bal tàm càr Dăk Lăk neh lam lơh ală broă lơh “cơdŭ ràng tăc phan 0 đong”. Tàm tŭ bơta kòp, ală bơnah phan bơna ờ sa priă neh bơnah lơi dong làng bol in geh tai phan ngui, phan sa ai dơ̆ sa pah ngai in.

Tơnơ̆ tŭ lòt dùl dar ală cơldŭ ràng tăc phan tàm “Siêu thị 0 đong”, mò Đoàn Thị Xuân Đào ơm tàm tổ dân phố 2, sơnah bòn Tân Lợi, ƀòn dờng Buôn Ma Thuột, càr Dăk Lăk, neh sac rơwah geh ală bơta mờ he kờñ geh bè phe, boh, bòk ngòk, sơdàng, dà màn, tơngi, phan tàm hộp mờ ală phan bơta biăp, bùm plai đo. Mò Đào pà gĭt, hìu bơnhă gơwèt hìu bơnhă rƀah, bơklau pa chơ̆t tài bơh kòp kơn jơ̆, dùl nă mò ròng 2 nă kòn dềt gam sơnam lòt bơsram. Nàng rcang tàm broă lơh lơh sa, mò Đào sùm kă bro tàm drà mơya mờr 1 nhai do mò pal ơm rlô tàm hìu nàng rcang sơndră kòp. Tŭ geh sơnah ƀòn pà sră blơi phan tàm Siêu thị 0 đong mò gơ lơh chờ hờp ngan. Mò Đào đơs:

Ưn ngài uă ngan broă lơh neh dong kờl añ tàm tơngai kòp do tài bơh ờ gŏ gơtùi lòt lơh broă, ờ lơh geh priă jền tŭ geh broă lơh do dong kờl kung dong he geh dùl bơnah lơi tơrmù ƀà kal ke tàm rài kis.

Làng bol sac rơwah is ală phan bơna kờñ pal geh tàm siêu thị mini 0 đong

"Siêu thị mini 0 đong" là broă lơh bơh Tỉnh Đoàn Dăk Lăk, Mpồl tam klăc bal cau ùr càr dê pơgồp bal mờ Công ty Cổ phần Vàng bạc đá quý Phú Nhuận (PNJ) sơnĕ Tây Nguyên – tiah đah jum tàm gùl lơgar bal mờ ală mpồl dong kờl lam lơh, nàng kờñ dong kờl làng bol geh rài kis kal ke, hìu bơnhă rƀah mờ hìu bơnhă ndrờm bè rơƀah. Tàm siêu thị geh mờr 40 phan bơna kờñ pal geh, phan ngui, phan sa mờ biăp, bùm, plai đo.

Bơh sră cih mat dan dong kờl bơh ală sơnah ƀòn, xã tàm ƀòn dờng Buôn Ma Thuột dê, Mpồl bơyai lơh neh ai 500 “ vé nùs nhơm” ai ală hìu bơnhă kal ke, tơl vé kờp priă 300 rơbô đong. Tàm tơngai bơh ngai 14 tus ngai 17/8, bơh 7 jiơ drim pah ngai, làng bol ngui sră do nàng “blơi” ală phan he kờñ. Bi Võ Chí Nhân, Kuang atbồ gah Marketing, Công ty Cổ phần Vàng bạc đá quý Phú Nhuận (PNJ) sơnĕ Tây Nguyên – tiah đah jum tàm gùl lơgar pà gĭt, mpồl bơyai lơh neh tă rlau 180 tơlak đong nàng blơi phan bơna bơh ală siêu thị dờng mờ giá tăc sỉ, mờ lĭp jat tàm giá do gơwèt mờ ală phan bơna tàm siêu thị mini 0 đong. Làng bol geh sac rơwah ală phan bơna mờ kờp priă ờ uă ir 300 rơbô dong nàng gàr niam tơl khà phan bơna pơndrờm mờ khà sră neh geh pà. Mờ khi kung ƀuơn ƀoài ngan sac rơwah tai ală bơta biăp, bùm plai đo jat jơnau kờñ.  

Ală phan bơna tàm siêu thị di pal gơ lơh bè tơl làm, cau lơi geh jơnau kờñ pal geh bơta lơi den geh sac rơwah jơnau kờñ pal geh hơ̆, añ geh ờ mìng lơh jat bơta tàm 300 rơbô đong lơm mờ khi gam geh sac rơwah is bè dùl siêu thị tơn, tŭ khi mut tàm siêu thị bè hơ̆. Gơwèt mờ añ sră pà 300 rơbô đong den sền gơlơh dùl ết mơya ngan ngồn tus tàm siêu thị den khi geh uă rlau mờ khà priă 300 rơbô đong, tài bơh bơh bơta mut lơh broă bơh Metro mờ Co.op dê, khi tăc mờ he mờ giá sỉ, den giá geh set up kung là giá sỉ sơl.

Đoàn viên ơruh pơnu dong kờl ală cau kuĕt kơlte sac rơwah phan bơna tàm siêu thị 0 đong

Jat bi Trần Doãn Tới, Phó Bí thư Tỉnh Đoàn Dăk Lăk đơs, bal mờ siêu thị mini 0 đong, rơnàng kơnòm să Dăk Lăk neh lam lơh uă broă lơh jat broă lơh “0 đong” bè Siêu thị ntrờn làm bă tiah, rơndeh 0 đong, pòr 0 đong, cơl dŭ tăc phan 0 đong,... nàng kờñ dong kờl ai ală cau geh rài kis kal ke mờ ală cau rƀah in gơtìp gơrềng tơn tài bơh kòp Covid-19. Bulah broă sơnđan krơi is mơya ală broă lơh ndrờm wèt tus broă dong kờl ală phan bơna kờñ pal geh nàng kờñ lơh geh tơl phan sa pah ngai ai làng bol in. Bal mờ broă dong kờl làng bol tàm anih bơyai lơh ràng tăc phan, ală đoàn kơnă hơ đơm gam crơng gơs ală mpồl shipper nàng dong kờl tus tơn tàm tiah ai ơm yah ngài, tiah wàng se kơryan kòp in.

Tơnơ̆ siêu thị 0 đong dơ̆ do geh lơh tàm Buôn Ma Thuột den bol añ geh bơyai lơh uă siêu thị 0 đong ndai lơh tàm ală mpồl kal ke tàm ù tiah gùt càr dê. Mờ mìng is mờ ală cau kal ke, cau gơtìp gơrềng tơn tài bơh kòp Covid-19 mờ ờ geh tơl bơta tus tơn tàm tiah dờp phan den geh mpồl shipper tơlir bơh mpồl đoàn dê geh jun tơn tus ală hìu bơnhă hơ̆ in nàng làng bol in geh bơta pơn dờm pơnđiang di tŭ mơ cèng wơl cồng nha.

Siêu thị 0 đong sơnah ƀòn Thống Nhất

Wèt bal tus mờ cau lơh broă khat gơboh mờ ală cau kal ke, cau dùl nă să is, ờ geh khà priă lơh geh kơ̆ kơl jap, bơh ngai 8/8 pa do, UBND sơnah ƀòn Thống Nhất, ƀòn dờng Buôn Ma Thuột kung bơyai lơh broă lơh “Siêu thị 0 đong” lơh tàm Hìu bơsram kấp dùl Lê Hồng Phong. Bơdìh mờ ală phan ngui kờñ pal geh mờ biăp, bùm, plai đo, tàm do gam geh poăc mờ ka ris. Tus tŭ do, broă lơh neh bơyai lơh geh 3 drà, mờ rlau 900 bơnah phan 0 đong ai làng bol tàm 9 xã, sơnah ƀòn tàm bòn dờng Buôn Ma Thuột.

Mò Trịnh Như Ngọc, Chủ tịch UBND sơnah ƀòn Thống Nhất, ƀòn dờng Buôn Ma Thuột, càr Dăk Lăk pà gĭt, tơl bơnah phan tàm hơ̆ geh ală combo kờp priă ndrờm bal nàng làng bol in sac rơwah ală bơta he kờñ blơi. Bơdìh hơ̆, làng bol gam geh sac rơwah is tai bàr pe phan bơna kờñ pal geh ndai tàm siêu thị. Bơh tŭ mut lơh broă, siêu thị 0 đong neh dờp geh uă bơta sền gròi, dong kờl bơh uă mpồl, cau dùl nă să is geh nùs nhơm niam mờ pơgap 200 tơlak đong priă mat mờ mờr 5 tấn biăp, bùm, plai đo. Bơh khà dong kờl do, siêu thị geh pơn jat tai pờ sùm tus jơh tơngai ai ơm yah ngài jat Chỉ thị sồ 15 bơh Thủ tướng Chính phủ dê.

Neh geh uă ngan cau geh nùs nhơm niam neh geh bơta sền gròi mờ tus tơn tàm siêu thị nàng dong kờl, tam pà bal ală bơta kal ke bơh làng bol dê, den tàng bè hơ̆, bol añ geh bơta pin dờn bơh jơh ală cau geh nùs nhơm niam dong kờl mờ uă ngan bơta phan bơna kờñ pal geh, phan ngui, phan sa, poăc ka, priă jền nàng bol añ in gơtùi lơh broă lơh dùl bơnă niam ngan, cèng tus ală bơnah phan pà niam ngan rlau jơh ai ală làng bol gam kờñ geh in. Bol añ kờñ tam pà bal dùl bơnah lơi kal ke tàm tơngai bè tŭ do ai làng bol in.

Mờ jơnau pơrya “dùl pét tàm tŭ jơgloh bè dùl kơnăm tàm tŭ hờm”, ală phan bơh ală broă lơh “0 đong” dê neh dong làng bol bơnah lơi tơrmù ƀà bơta kal ke. Ală bơnah phan ngai sơlơ geh kuơ ngan tài bơh gơ di pal tơn mờ di tŭ tơn ală bơta kờñ pal geh mờ làng bol gam kờñ geh tàm hìu bơnhă bơh làng bol dê tàm tơngai kòp.

Cau cih H’Xíu H’Mốc- Cau mblàng K’Hạnh