VOV4.K’ho- UBND ală xã tiah nhàr lơgar bơh càr Dak Lak dê, tàm hơ̆ geh ală xã Ia R’vê, Ia Lốp, Ea Bung (kơnhoàl Ea Súp) mờ xã Krông Na (kơnhoàl Buôn Đôn) pa pơgồp bal mờ ală Pôs đồng ling sền gàr tiah nhàr lơgar lơh pôs đồng tàm ù tiah càr dê bơyai lam lơh srơh “Gùt làng bol tus bal rcang sơndră kòp Covid-19 mờ lik mut tàm lơgar tìs mờ kơrnoat boh lam”. Jat hơ̆, ala mat Mpồl Atbồ is 51 thôn, ƀòn gơwèt 4 xã tiah nhàr lơgar neh kĭ hơ tus bal lơh jat srơh mờ ală tơngume bè: Sùm mblàng yal hòi jà làng bol, cau tàm mpồl lơh jat niam gùng dà broă lơh bơh Đảng mờ broă lơh adat boh lam dà lơgar dê, jơnau sồr bơh ală tiah dê, ngan là adat boh lam bè atbồ, sền gàr tiah nhàr lơgar bơh dà lơgar dê, jơnau sồr bè rcang sơndră kòp Covid-19.

Jơh ală hìu bơnhă làng bol hơ lơh jat Adat Tiah nhàr lơgar dà lơgar dê, lơh jat niam ală Chỉ thị, jơnau bơto pơlam bơh kấp hơđang dê bè ală broă lơh rcang sơndră kòp Covid-19, lơh jat niam broă yal tơngĭt tiah lòt tê bơh gah lơh sơnơm, bañ tơrgùm uă ir khà cau jat jơnau sồr.

Cau mblàng K’Hạnh