VOV4.K’ho-Tàm Dak Lak, tiêu tăc khà priă sùm gơmù mờ ờ hềt tus tu\ lơi hơ\ sồng ờ gơmù tai, tàm tu\ bă tiêu neh sơrlèt rlau tus 2 dơ\ pơndrờm mờ rơndăp ù tiah ai tam. Bulah anih lơh broă geh gơnoar bơto yal lài ba` tăc tiêu tàm tơngai do, mơya tài bơh gơkòl priă tơm dồs mờ priă ngui sa tàm rài kis, den tàng cau lơh broă sa ờ gơtùi prăp geh.

Jơnau lơh gơlik bơta hoàc hươr do là bơh lơi? Kờ` pal lơh bơta lơi nàng gah phan tiêu bơtàu tơnguh kơ\ kơl jăp sùm? Mò Vũ Thị Thanh Bình, Phó Chi cục trưởng Chi cục Tam phan mờ Sền gàr phan tam càr Dak Lak dê yal loh làng rlau tai bè jơnau do.

            Ơ mò! Ală nam lài, tiêu tăc khà priă gơguh jơnhoa sùm, cau lơh broă sa càr Dak Lak rề ơnàng bă ù neh ur ar tam tờm chi tam do. Tus tơngai do, dan mò pà gi\t loh làng?

          Mò Vũ Thị Thanh Bình: Ală nam lài do, tiêu tăc khà priă gơguh jơnhoa sùm, den tàng cau lơh broă sa tàm càr Dak Lak sùm tàm đòm jat gơ\p ur ar tam tờm chi tam do. Bă ù sùm gơguh, bè: Nam 2014 là 16 rbô lồ, nam 2015 gơguh tus rlau 21.400 lồ, nam 2016 gơguh tus rlau 27.500 lồ mờ tus nam 2017 den bă ù neh gơguh tus rlau 38.600 lồ.

Bă tiêu geh tam uă tàm ală kơnhoàl, bè: Krông Năng, Cư\ Kui`, Ea H’leo, Ea Kar mờ Buôn Hồ. Geh tu\ là tàm ală bă ù ờ gơdờp; bàr pe tiah geh dà căt uă bè tàm M’Drak, Lak, Ea Súp den cau lơh broă sa kung gam rề ơnàng bă ù tam uă tờm tiêu sơl. Càr neh rơndăp ù tiah ai tam tus nam 2020 mìng geh 17 rbô lồ lơm, mơya tu\ do neh gơguh rlau 38.600 lồ.

            Bơh nam lài tus tu\ do, tiêu tăc khà priă sùm gơmù, geh tu\ là gơmù tus ndrờm mờ khà priă lơh gơs, neh lơh aniai bè lơi tus mờ broă lơh sa mờ rài kis bơh làng bol dê, ơ mò?

          Mò Vũ Thị Thanh Bình: Đơs ngan là bơh nam lài tus tu\ do den tiêu tăc khà priă sùm gơmù uă ngan; bơh 200 rbô đong tàm dùl ki\ tus tu\ do, tiêu tăc khà priă gơmù ngai sơlơ lơyah mờ tu\ do là pơgăp 50 rbô đong tàm dùl ki\; bè hơ\ là tiêu tăc khà priă lơyah ngan mờ ndrờm bal mờ khà priă lơh gơs. Neh lơh aniai uă ngan tus broă lơh sa mờ rài kis bơh cau tam tiêu dê.

Anih lơh broă geh gơnoar neh bơto yal lài làng bol, sồr ba` tăc ur ar tàm tơngai tăc khà priă gơmù lơyah ir bè tu\ do. Bulah tiêu tăc gơmù khà priă uă ngan, mơya cau lơh broă sa kung gam pal tăc sơl nàng geh priă tơm dồs mờ ngui sa tàm rài kis.

Tiêu tăc gơmù khà priă tus tu\ lơi

            Bơh bơta geh ngan hơ\, den mò geh jơnau bơto pơlam lơi gơ wèt mờ làng bol lơh broă sa?

          Mò Vũ Thị Thanh Bình: Đơs ngan bơh lài tus tu\ do, ală anih lơh broă geh gơnoar sùm tơngkah gơ wèt tus mờ jơh ală tờm chi tam, ờ go\ di rề ơnàng bă ù mhar ir. Mơya tàm bơta geh ngan den là kal ke ngan, tài bơh hơ\ là gơnoar bơh cau lơh broă sa dê tàm bă ù khi dê.

Bộ Nông nghiệp mờ Phát triển nông thôn neh bơyai lơh pơrjum sồr dong kờl bơtàu tơnguh tiêu kơ\ kơl jăp jo\ jòng. Tàm hơ\ sồr mblàng yal hòi jà cau lơh broă sa ờ go\ di rề ơnàng bă ù tam pa bơdìh mờ tiah rơndăp ù tiah ai tam.

Ờ go\ di tam pa wơl gơ wèt mờ bă tiêu neh jo\ sơnam kra ir, ù tiah ờ gơdờp halà ală bă tiêu gơtìp chơ\t tài bơh tu kòp lơh aniai. Tam gơl bă ù do nàng tam ală tờm phan tam ndai geh priă jền uă rlau bè ală tờm chi sa plai.

Mơya, gơ wèt mờ ală bă tiêu neh jo\ nam, ù tiah gơdờp, cau lơh broă sa neh gi\t ngan tàm broă sơngka sền gàr den gàr wơl mờ sơngka sền gàr sươn chi, ơm kơ\p khà priă tiêu gơguh wơl.

Mờ bơta lơh ngan bơh gah lơh broă sa sươn sre dê, ală mpồl lơh sa kă bro mờ cau lơh broă sa neh rơndăp tăp sèng wơl gah lơh broă sa sươn sre, gah phan tiêu đơs is den gơtùi pin dờn ngan là, gah lơh tiêu geh bơtàu tơnguh kơ\ kơl jăp mờ jo\ jòng sùm!

Ơi dan ưn ngài mò uă ngan!

Cau mblàng- Lơ Mu K’Yến