VOV4.K’ho- Lơh jăt Cỉ thị bơh Tỉñ ủy Dăk Lăk, bơh nam 2004 tus tŭ do, geh 1 rơbô 194 anih lơh broă, mpồl lơh broă tàm càr Dăk Lăk neh lơh oh mi bal mờ 758 ƀòn làng bol kòn cau. Tơnơ̆ mờ mờr 17 nam đềt mềr bal, mờ ală broă dong kờl mùl màl, muh măt ală ƀòn ngai sơlơ tam gơl niam, rài kis làng bol geh gơguh, khà hìu rơƀah gơmù.

Bol añ bal mờ kuang bàng, cau lơh broă tàm Kông ty Điện lực Dăk Lăk tus còp ƀòn lơh oh mi bal M’briu, xã Cư̆ Né, kơnhoàl Ea Kar. Di tàm dơ̆ do, đoàn viên kông ty pà chèo lơh sơnơm, dà rào tê, phan sa mờ lam sồr bè ală broă rơcang sơndră mờ kòp Kovid-19 ai làng bol in. Bal mờ hơ̆, ala măt Mpồl kuang bàng atbồ kông ty kung pà 2 nơm kơnrồ geh 40 tơlăk đong ai bàr hìu rơƀah tàm ƀòn in.

                       Đoàn viên Kông ty Điện lực Dăk Lăk jào phan pà dong kờl làng bol rơcang sơndră mờ kòp gơtờp
 Ồng Y Suk Niê, Ƀí thư Ci bộ ƀòn M’briu, xã Cư̆ Né yal, ală nam lài rài kis bơh làng bol tàm ƀòn gam uă kal ke, khà hìu rơƀah gam tàm khà uă, geh broă sền gròi mờ bơcri priă bơh Đảng mờ Dà lơgar, broă dong kờl bơh công ty lơh oh mi bal, tŭ do khà do neh gơmù tàm khà hờ đơm 5%. Tàm dơ̆ gơtìp kòp Kovid-19 lồi nhai 9 lài do, tàm ƀòn geh 146 nă cau lơh broă bơh tàm ală càr, ƀòn dờng hờ tiah đah jum rê pleh mờ kòp gơtờp, ală kấp, gah lơh broă tàm càr bal mờ kông ty điện lực Dăk Lăk neh tus dong kờl. “Kông ty Điện lực Dăk Lăk lơh oh mi mờ ƀòn M’briu bơh nam 2004 mờ geh uă ngan broă dong kờl. Kông ty sùm còp să, pà phan tàm ală dơ̆ satềp trung thu, ngai chờ dờng, satềp; dong kờl ai làng bol in bè hìu ơm, phe sa sơndră mờ jơgloh tàm tơngai puh pah ha là pà kơnrồ ai hìu rơƀah in. Rơhời khà hìu rơƀah tàm ƀòn neh gơmù uă ngan. Tàm dơ̆ kòp gơtờp do, cau tus pà chèo, dà rào tê lơh kloh vi khuẩn; lam sồr làng bol tàm broă rơcang sơndră mờ kòp gơtờp ha là lơh jăt nền nòn ală jơnau bơto sồr 5K bơh Bộ Y tế, pơn chèo, bañ tơrgùm gal cau. Làng bol lơh jăt niam den tàng tus tŭ do tàm ƀòn ờ hềt geh cau F0 lơi”.

                Ala măt kuang đơng lam Kông ty Điện lực Dăk Lăk pà kơnrồ hìu rơƀah tàm ƀòn M'Briu in

Ƀòn M’briu, xã Cư̆ Né, kơnhoàl Ea Kar tŭ do geh 268 hìu mờ rơlao 1 rơbô 300 nă làng bol, geh rơlao 95% là kòn cau Rơđê. Ồng Trần Văn Thuận, Kuang atbồ Kông ty Điện lực Dăk Lăk pà git, jăt Cỉ thị bơh Tiñ ủy Dăk Lăk, nam 2004, kông ty neh lơh oh mi mờ ƀòn M’briu. Nàng dong kờl ƀòn lơh oh mi, pah nam tàm ală dơ̆ ngai chờ, ngai satềp, kông ty geh bơyai lơh tus còp să, lam sồr, pà phan hìu rơƀah, hìu geh sră dong kờl bơh dà lơgar; bơ̆t bơtàu ală broă lơh mùl màl nàng dong kờl làng bol tơnguh bơtàu broă lơh sa, tơn njơh jơgloh tơmù rơƀah. “Jăt broă lơh oh mi, pah nam den kông ty neh ai ală rơndăp broă lơh pah nam, broă dong kờl rài kis mpồl bơtiàn mờ sền gròi tus mờ ală hìu nhă geh sră dong kờl bơh dà lơgar, hìu nhă kal ke nàng tơnguh bơtàu lơh sa. Gơwèt mờ mờ M’briu, ală kal ke mờ tŭ do gơtìp tàm ƀòn den kông ty neh git mờ geh ai ală broă lơh nàng dong kờl mùl màl gơwèt mờ làng bol tàm ƀòn bè bơ̆t bơtàu ƀòn chài rơgơi”.

                 Ala măt kông đoàn VOV-Tây Nguyên pà phan ƀòn B'Hôk gơtìp wàng se kơrian kòp in

Ƀòn B’hôk, xã Yang Tao, kơnhoàl Lăk kung là ƀòn lơh oh mi mờ Anih pờ tơlik jơnau đơs Việt Nam tàm Tây Nguyên (VOV-Tây Nguyên) bơh nam 2004 sơl. Tàm ƀòn tŭ do geh mờr 270 hìu mờ rơlao 1 rơbô nă làng bol, mìng là làng bol kòn cau Mnông. Jăt ồng Y Mor Kuăn, kuang atbồ ƀòn B’hôk yal, bơh tŭ geh lơh oh mi bal, VOV-Tây Nguyên sùm tus bal, dong kờl làng bol tàm ƀòn. Bal mờ broă còp să, pà phan di tàm ală ngai chờ, ngai satềp, VOV-Tây Nguyên neh lam sồr ală mpồl lơh sa kă bro lơh pà 5 nơm hìu nùs nhơm geh 400 tơlăk đong ai ală hìu rơƀah, hìu nhă geh sră dong kờl bơh dà lơgar in. Tŭ kòp Kovid-19 gơtìp tàm lồi nhai 9 nam 2021, tàm ƀòn geh mờr 200 nă cau lòt lơh broă tàm tiah ngài rê pleh mờ kòp gơtờp, tàm khà cau do geh uă cau geh gŏ mờ kòp, hơ̆ sồng jơh gùt ƀòn gơtìp wàng se kơrian, ala măt VOV – Tây Nguyên neh tus dong kờl làng bol. “Ƀòn B’hôk gơtìp wàng se 14 ngai, ờ gơtùi lòt lơh broă, ờ tơl uă bơta. Mpồl lơh oh mi là VOV-Tây Nguyên tus pà tơl hìu 10 kĭ phe, 1 khàr dà tơngi, 1 kơl dung ƀòk ngòt, dà màn, ka rì; bal mờ chèo lơh sơnơm, dà rào tê lơh kloh vi khuẩn... làng bol chờ hờp ngan. Geh tai phan sa nàng tam cah is rơcang sơndră mờ kòp gơtờp, làng bol iang nùs sơrlèt mờ tơngai kal ke tam cah is do”.

             Ala măt kuang đơng lam VOV-Tây Nguyên pà phan satềp làng bol lơh oh mi tàm ƀòn B'Hôk in

Lŏ Vũ Nam Trang, cau ai tơngit jơnau đơs bơh VOV-Tây Nguyên pà git, tàm dơ̆ kòp gơtờp nam 2021, bal mờ broă tă pơgồp bal den Mpồl đơng lam Kông đoàn anih lơh broă gam lam sồr ală cau geh nùs nhơm niam dong kờl gah lơh sơnơm càr Dăk lăk rơlao 200 tơlăk đong nàng blơi phan, phan lơh sơnơm, sơnơm drơng broă rơcang sơndră mờ kòp gơtờp in; pà mờr 5 tấn phan sa ai làng bol kis tàm ƀòn lơh bơyô B’hôk tàm tơngai ƀòn gơtìp wàng se, kơrian tài kòp gơtờp. “Mờ gơnoar là cau ai tơngit jơnau đơs dê den bol añ tơnguh broă hòi jà ală cau geh nùs nhơm niam bal mờ broă pơgồp bal bơta pràn bơh să tờm nàng dong kờl ai làng bol kis tàm tiah ngài, tiah gơtìp wàng se kơrian tài bơh kòp Kovid-19. Kung bơtoah ngan là ală cau geh nùs nhơm niam tŭ lơi kung rơcang lơh broă bal mờ mpồl cau ai jơnau tơngit bol añ dê nàng tus tơn tàm ală tiah gơtìp wàng se, tiah ngài nàng jào pà phan ai làng bol gơtìp gơrềng bơh kòp Kovid-19 in”.

Mờr 17 nam do, mờ broă dong kờl bơh Kông ty Điện lực Dăk Lăk bal mờ VOV-Tây Nguyên, bàr ƀòn lơh oh mi M’briu mờ B’hôk neh geh ală tam gơl loh làng ngan, rài kis rơhời gơguh, tàm hơ̆ uă ngan là tŭ kòp Kovid-19 lơh gơbàn.

Cau cih Tuấn Long-Cau mblàng Ndong Brawl