VOV4.K’ho- Tàm càr Dăk Lăk, rài bè ờs neh rơhời tus wơl mờ làng bol tàm ală tiah tờm gơtìp kòp tŭ ală cau gơtờp mờ kòp Kovid-19 neh geh sền gròi, kòp gơtờp neh geh kơrian. Uă cau gơtìp kòp tơnơ̆ mờ tơngai sơm kòp neh rê tàm bơta kờñ gơboh bơh cau pròc mhàm bal mờ mpồl bơtiàn. Kòp gơtờp neh dong kờl ală cau rềp bal rơlao mờ sền kuơ  ală tŭ lơngăp lơngai bal.

Tơnơ̆ mờ 1 nhai jơh hìu nhă pal lơh jăt broă tam cah ngài tơrgùm bal tài gơtờp bơh kòp Kovid-19, bi Đỗ Văn Lực, kis tàm ƀòn Cuôr Dăng A, xã Cuôr Dăng, kơnhoàl Cư̆ Mgar chờ hờp ngan tài hìu nhă neh ờ do ờ tă mờ tơrgùm bal.

                                                     Làng bol neh rê wơl mờ rài kis bè ờs pa

Bi Lực yal, tàm dơ̆ kòp gơtờp lòt gan tàm xã bồ nhai 11, hìu nhă bi 5 nă cau den geh tus 4 nă gơtìp gơtờp mờ kòp Kovid-19. Tàm hơ̆, jơh bàr nă ùr bơkao ndrờm pal tam cah is nàng sơm kòp den tàng lơh rài kis sơlơ kal ke. Ờ sŭk ngan là 2 nă kòn gam dềt, gam tàm sơnam sa, sơnam dờng lòt bơsram kung gơtìp kòp. Bơta ờ sŭk tài kòp gơtìp uă kàr lơi den dờp bơta bơtoah bời kòp, cau tàm hìu kung uă bè hơ̆ sơl: “Tŭ sơnrờp den ờ git lơh bè lơi, ờ sŭk ngan, tài cau lơi kung gơtìp jơh den tàng kung ngòt ngan. Tơnơ̆ mờ hơ̆, bác sĩ sơm kòp lam sồr bañ ngòt, tàp pràn să jan, sào sa niam, bơta pràn kơl dang să jan niam là sơrlèt mờ kòp. Cau tàm hìu añ bơtoah ngan tŭ geh rê wơl mờ rài kis bè ờs”.

                              Làng bol tàm tiah tờm gơtờp kòp neh rê wơl mờ rài kis bè ờs pa

Kung neh geh tŭ là dùl tàm ală tiah tờm gơtìp kòp tàm càr Dăk Lăk, tŭ do rài kis bơh làng bol tàm xã Cư̆ Pui, kơnhoàl Krông Bông neh bè ờs wơl. Ồng Y Bran Niê kis tàm ƀòn Khoá, xã Cư̆ Pui chờ hờp ngan tŭ hìu nhă geh 6 tàm 9 nă cau là F0 ndrờm neh geh sơm bời. Ồng Y Bran pà git: Bal mờ bơta ờ sŭk bè bơta pràn kơl dang să jan mờ màng kis, tŭ ală cau tàm hìu ndrờm gơtìp lòt tam cah is nàng sơm kòp den gam geh bal bơta ờ sŭk bè kàl lơh sa, tài kơphe neh tus tơngai pic plai; rơpu, kơnrồ pal geh cau ê. Kung kơnờm mờ gơnoar atbồ dong kờl, làng bol hòi điện thoại còp să, ală y bác sĩ neh jơh nùs sơm kòp den tàng ală cau neh pràn kơl dang mờ rê tàm hìu ờ do ờ dă. Phan tam, phan ròng kung geh dong kờl sền gàr nền nòn: “Cau tàm hìu nhă gơtìp F0 kung ờ sŭk ngan tơl nă cau ơm tơl tiah ờ tơrgùm bal, ờ gơtùi hòi lùp lăp bal. Añ bơh broă do gŏ broă sền gàr tơl niam, piang sào tơl. Añ rê tus tàm do tìp wơl cau tàm hìu chờ hờp ngan. Añ ờ ngòt tai tài ală cau ndrờm neh bời kòp bloh, pràn kơl dang bè ờs mờ lòt rê wơl bè ờs”.

            Ală piang sào geh tam pà mờ ală cau rê tam cah is nàng rơcang sơndră mờ kòp Kovid-19

Kơnhoàl Krông Bông là dùl tàm ală tiah geh dờp uă cau gơtờp kòp Kovid-19 tàm mpồl bơtiàn. Mơya, tus tŭ do geh uă cau neh bời kòp, rê mờ hìu nhă mờ pơn jăt tai lơh broă sa. Ồng Nguyễn Ngọc Pháp, Phó Củ tịc UɃÑZ kơnhoàl Krông Bông pà git: tàm ală ƀòn, lài do là tiah tờm gơtìp kòp den tŭ do ờ gam geh gŏ tai cau gơtìp kòp tàm mpồl bơtiàn. Kơnhoàl neh rê wơl gơs tiah tơlir, mơya nùs nhơm rơcang lài, git tàm broă rơcang sơndră mờ kòp gam pơn jăt tai geh lơh jăt. “Mpồl đơng lam kơnhoàl kung neh lơh ngan đơng lam tơrgùm wàng se, kơrian, lơh kloh vi khuẩn, lùp sền mờ jòi ală cau F1, F2 mờ di tŭ ai lòt tam cah is. Gam gơwèt mờ tiah gơtìp wàng se den neh geh sền gròi nền nòn ngan den tàng kơnhoàl Krông Bông neh mhar kơrian geh kòp gơtờp”.

Jăt khà kờp bơh gah lơh sơnơm càr Dăk Lăk yal, kờp tus ngai 16 nhai 12, gùt càr neh dờp geh rơlao 9 rơbô 700 nă cau gơtìp kòp Kovid-19, tàm hơ̆ geh rơlao 7 rơbô nă cau neh geh sơm bời. Càr pin là kòp Kovid-19 gam rơhời geh sền gròi, mờ neh ai ngui broă lơh 1 hìu sơnơm ing. Uă tiah tàm càr, geh bal ală tiah tờm gơtìp kòp, làng bol gam gơdờp bal niam mờ geh bơta mùl màl bè ờs pa.

Cau cih Tuấn Anh-Cau mblàng Ndong Brawl