VOV4.K’ho- Ngai 30/12, càr Dăk Lăk neh bơyai lơh Pơrjum tơn jơh 20 nam lam lơh jat Nghị quyết sồ 13 nam 2022 bơh Ƀan Cấp hàñ Đảng dà lơgar khóa 9 dê bè pơn jat tai tam gơl pa, bơtàu tơnguh mờ tơnguh cồng nha lơh sa mpồl bal, 10 nam lơh jat Adat Hợp tak xã.

Yal tàm pơrjum, bơh 20 nam lơh jat Nghị quyết, gùt càr tŭ do geh 608 Hợp tak xã, tàm hơ̆ geh 390 Hợp tak xã lơh broă tàm gah lơh sa suơn sre, 218 Hợp tak xã ờ di lơh sa suơn sre. Lơh sa lơh broă bal ai geh broă lơh sùm ai 21 rbô nă cau lơh broă in, priă lơh geh kờp bal gơguh 10 dơ̆ tàm tơngai tŭ do. Đơs tàm pơrjum, ồng Nguyễn Đình Trung, Ủy viên Đảng dà lơgar, Ƀí thư Tỉnh ủy Dăk Lăk sồr ală kấp, ală gah broă lơh, ală tiah tàm càr pơn jat tai chồl pràn broă lơh mblàng yal, hòi jà nàng kờñ tơnguh jơnau git wă bè lơh sa mpồl bal, Hợp tak xã, di tŭ tă bơsong kal ke, kòl yan, lơh gơlik bơta niam ngan rlau jơh ai Hợp tak xã in bơtàu tơnguh. Bơt bơtàu ală broă lơh lơh sa mpồl bal pa di mờ tŭ tơngai dơ̆ kac màng kông nghiệp 4.0.

Cau mblàng K’Duẩn