VOV4.K’ho- Tàm ală dơ̆ tìp măt đah cau tĕ khà mờ cau tơlik măt tĕ khà Kuang bàng Hội đồng Nhân dân ală kấp tàm càr Dăk Lăk geh lơh pa do, uă cau tơlik măt tĕ khà neh yal broă lơh broă bơh he dê dùl bă jơh nùs jơh tồr ngan. Kuơmàng, ală cau tơlik măt tĕ khà là cau ùr jơi bơtiàn kòn cau dùl êt nă cau bulah là dơ̆ sơnrờp tus bal tơlik măt tĕ khà mơya neh lơh geh ală broă lơh broă loh làng, rềp mềl mờ bơta geh ngan, geh cau tĕ khà dùl nùs bal.

Tơn jơ̆ wơl dơ̆ tìp măt cau tĕ khà hòi jà tĕ khà, bi Vi Thị Kiều Chi (cau Tày) là cau tơlik măt tĕ khà Kuang bàng Hội đồng Nhân dân càr Dăk Lăk tơngai lơh broă bơh nam 2021- 2026 neh dờp geh uă bơta tă pơgồp tơn jơnau đơs bơh cau tĕ khà dê nàng pơn jăt tai lơh sir tơngume broă lơh broă bơh he dê. Là cau tơlik măt tĕ khà dềt sơnam ngan rlau jơh tus bal tơlik măt tĕ khà tàm mpồl tĕ khà sồ 01 (ƀòn dờng Buôn Ma Thuột), bi Vi Thị Kiều Chi yal, să tờm bi neh lơh geh broă lơh broă gơ jăt bal mờ sền gàr gơnoar mờ bơta kuơ bơh đoàn viên, ơruh pơnu mờ kơnòm pa tàu, kơnòm dềt dê. Tàm hơ̆, sền dờng màng tus broă sơlơ sền gròi ai ală kơnòm pa tàu kơnòm dềt tàm tiah sar lơgar ngài, tiah kal ke mờ jơi bơtiàn kòn cau dùl êt nă cau in. Jăt bi Vi Thị Kiều Chi yal, dơ̆ sơnrờp tơlik măt tĕ khà gơlơh pa ngan, ờ quèng ngan mơya bi pin dờn broă lơh broă mờ bi lơh mờ yal tềng đăp cau tĕ khà là geh kuơ ngan ngồn mờ tiah he dê. Bi Vi Thị Kiều Chi đơs: Tàm broă lơh broă den să tờm añ đơs is mờ kung là ala măt ai mpồl duh broă Đoàn in den kung lơh broă lơh broă lơh jăt tàm broă lơh jăt ală gơnoar, kơnòl mờ sền gàr bơta kuơ dipal ai cau là đoàn viên, ơruh pơnu, kơnòm pa tàu, kơnòm dềt in. Bơdìh hơ̆ tai den să tờm añ kung là dùl nă cau ùr mờ gĭt wă ngan gơnoar broă, kơnòl broă bơh cau ùr dê den tàng añ tơrgùm tai tàm ală broă gơrềng tus broă lơh sền gàr mờ dong kờl cau ùr mờ kơnòm dềt tàm ù tiah do tàm tơngai tus.

Càr Dăk Lăk neh lơh sir jơh ală dơ̆ tìp măt mờ cau tĕ khà hòi jà tĕ khà kuang bàng Hội đồng Nhân dân ală kấp

Ai gơwèt mờ bi H Jai HMok là cau Rơđê, dơ̆ sơnrờp tơlik măt tĕ khà kuang bàng Hội đồng Nhân dân xã Dray Bhăng, kơnhoàl Cư Kuiñ den bi neh lơh broă lơh broă tơrgùm tàm broă lơh hòi jà, bơtòm tơrgùm oh mi cau ùr jơi bơtiàn kòn cau dùl êt nă cau là cau dòn yàng. Bi H Jai HMok pà gĭt, tàm xã geh 92% cau tàm mpồl cau ùr là cau jơi bơtiàn kòn cau mờ cau dòn yàng. Mpồl cau ùr xã neh lam lơh uă broă lơh dong kờl oh mi cau ùr bơtàu tơnguh lơh sa, tơnguh uă priă lơh geh, kơnờm bè hơ̆ neh gơhòi gơ jà gal ngan oh mi cau ùr tus bal tàm mpồl cau ùr, pơgồp bơnah tàm broă bơtàu tơnguh lơh sa mpồl bơtiàn, lơh khà hìu bơnhă rƀah bal bơh xã dê gơmù mìng gam rlau 5%. Dilah geh pồ lơh kuang bàng Hội đồng Nhân dân xã tơngai lơh broă tus, mờ jơnau kờñ tơnguh uă cồng nha mờ lơh pràn ală srơh tàm pơrlòng tàm tiah do mờ dùl mpồl cau tờm là bơh oh mi cau ùr, bi H Jai HMok geh lơh ală broă lơh broă, lơh broă dipal nàng gơhòi gơ jà cau ùr tus bal tàm ală srơh, dong kờl bơtàu tơnguh lơh sa mờ bơ̆t bơtàu hìu bơnhă ring lơngai, chờ hờp. Bi H Jai HMok, đơs: Uă ngan làng bol tàm ƀòn lơgar kis jăt rài kis ờ gŏ kờñ kơlôi tai mờ ờ kờñ tus bal lơh broă mpồl bơtiàn, khi kis is, den tàng tàm broă lơh broă tus, añ geh lơh broă lơh hòi jà. Lài ngan là geh ai tơlik gùng dà broă lơh, tơngume lơh broă geh bơta gơhòi gơ jà nàng khi in tus bal, nàng khi gĭt gŏ là bơh broă lơh broă hơ̆, lơh jăt ngan ngồn den khi gơlơh sền gŏ tàm rài kis mpồl bơtiàn mờ tàm broă yàng geh bơta ndrờm bal mờ khi geh lơh broă bal mờ he.

Tơlik măt tĕ khà tàm ƀòn lơgar geh uă jơi bơtiàn kòn cau, tơrgùm gal jơi bơtiàn kòn cau dùl êt nă cau bơh tiah đah tô dà lơgar mŭt ơm kis, bi Hoàng Thị Huệ, cau Nùng, cau tơlik măt tĕ khà Hội đồng Nhân dân xã Ea Tam, kơnhoàl Krông Năng, càr Dăk Lăk lời bơta sền gròi uă tus broă prăp gàr bơta niam chài jơi bơtiàn gơ jăt bal mờ bơtàu tơnguh lơh sa tàm tiah do dê. Tàm broă lơh broă bơh he dê, bal mờ kơnòl broă bal mờ kấp ủy, gơnoar ătbồ tiah do hòi jà làng bol, cau tàm mpồl tus bal bơ̆t bơtàu ƀòn lơgar pa gơguh jơnhoa, tàm gơnoar broă là Kuang ătbồ Mpồl cau ùr xã dê, bi Hoàng Thị Huệ tơrgùm ai tơngume lơh jăt ring bal cau ùr mờ cau klau, bơ̆t bơtàu broă lơh “5 ờ, 3 sàng goh”, dong kờl cau ùr tam gơl tờm chi tam, phan ròng mờ sền gàr bơhiàn niam chài krơi is bơh rài yau bơh ală jơi bơtiàn kòn cau dùl êt nă cau tus bơh tiah đah tô dà lơgar dê tàm broă lơh hòi jà tĕ khà.

Măt ală cau tơlik măt tĕ khà dê neh geh lir tŏp ờ ndơ̆p mpồn nàng làng bol in ƀươn tàm broă sền nàng gĭt mờ săc rwah nàng pồ

Bi Hoàng Thị Huệ, đơs nền: Dilah cau tĕ khà pin dờn pồ bol añ lơh broă tàm Hội đồng Nhân dân xã tơngai mờr tus den să tờm añ geh lơh ngan lơh jăt niam ală broă neh lơh geh tàm tơngai lài, iăt kơno kơlôi sơnơng bơsram ală kơrnoat bơh kấp hơđang dê kung bè ală broă lơh jơnau kờñ bơh kấp hơđang dê nàng lam lơh tus làng bol ƀòn lơgar in.

Tơngai lơh broă bơh nam 2021- 2026, càr Dăk Lăk geh pồ nàng săc rwah geh 75 nă kuang bàng Hội đồng Nhân dân kấp càr, 514 nă kuang bàng Hội đồng Nhân dân kấp kơnhoàl mờ 4 rbô 667 nă kuang bàng Hội đồng Nhân dân kấp xã. Tàm hơ̆, sền gàr jăt di nùs nhơm Kơrnoat 1187 bơh Ủy ban Thường vụ Quốc hội dê, là geh êt ngan rlau jơh là bơh 35% cau tơlik măt tĕ khà là cau ùr, lơh ngan khà cau ùr geh pồ gơkờn pơgăp 30%. Tus tơngai do, jơh ală anih tĕ khà neh jơh lơh sir broă tìp măt cau tĕ khà hòi jà tĕ khà jăt di jơnau sồr. Mat mờ rài kis broă lơh bơh cau tơlik măt tĕ khà dê kung neh geh lir tŏp jơh tàm ală tiah tĕ khà nàng làng bol gơtùi sền nàng gĭt loh làng.

Gơwèt mờ ală broă lơh broă geh ală cau tơlik măt tĕ khà sền mờ yal tàm ală dơ̆ tìp măt mờ cau tĕ khà hòi jà tĕ khà pa do, geh dong cau tĕ khà gĭt wă loh làng rlau bè broă rơndăp lơh lơh broă bơh ală cau tơlik măt tĕ khà dê tŭ geh pồ lơh kuang bàng Hội đồng Nhân dân tơngai lơh broă tus, bơh hơ̆ geh bơnàng jă nàng săc rwah geh ală kuang bàng ngan ngồn geh nùs nhơm niam, geh broă lơh jak, jơh nùs jơh tồr mờ broă lơh tàm dơ̆ tĕ khà geh lơh tàm ngai 23/5 mờr tus.

Cau cih H’Xíu H Mốc- Cau mblàng Lơ Mu K’Yến