VOV4.K’ho- Kòp Covid-19 gơlik geh kal ke, broă bơto mờ bơsram sră pal gàr niam bơta ờdo ơdă kòp mơkung pal lơh sir kơnòl broă ờs mờng gam ai tơlik ai ală hìu bơsram tàm Dăk Lăk in uă ngan bơta kal ke mờ bơta lòng. Rcang lài, ngăc ngar tam gơl gơdờp gơ gơs bơta lam lài gam geh gùt gah bơto bơtê càr Dăk Lăk dê lơh jat nàng lơh sir jơnau kờñ dơ̆ lĕ bal.

Tơnơ̆ tơngai mờr 3 poh lơh jat broă bơto bơtê mờ bơsram tàm internet, ùr pơgru mờ kơnòm bơsram mầm non thị trấn Phước An, kơnhoàl Krông Pách, càr Dăk Lăk chờ hờp, kơ̆p gơn tŭ dờp geh jơnau yal bơh ngai 04/10 kơnòm bơsram “tiah tơlir” gơtùi lòt bơsram wơl tàm hìu bơsram. Mơya mìng tơnơ̆ 1 ngai bơsram tơn, UBND kơnhoàl lơh nền ală hìu bơsram ơm ing broă bơsram tơn, tam gơl bơsram tàm internet tài bơh bơta gơlik geh bơh kòp dê kung gam kal ke sơl. Ùr pơgru Trần Thị Nga, Hiệu trưởng Hìu bơsram mẫu giáo thị trấn Phước An pà gĭt, ờ gơ lơh nrơ̆t, halà rơmơ̆p ndơl sơl tàm bơta bè do. 

Hìu bơsram mầm non thị trấn sùm tàm nùs nhơm wă ală sau lòt hờ hìu bơsram. Hìu bơsram neh pơs wàs jơh hìu bơsram, cơl dŭ bơsram, bơyai lơh ai ală cau pơgru in bơka jat tơngume tờm. Hìu bơsram neh mblàng yal tus jơh ală cau pơgru, kuang bàng, cau lơh broă bè broă lơh rcang sơndră kòp jat sră nggal sồr bơh kấp hơđang dê. Bơyai lơh ai ală ùr pơgru lơh ală video bơto bơtê ai ală sau in bè bơta chài kis, bè broă lơh rcang sơndră kòp mờ ală jơnau bơto bơtê kuơ màng tàm ơdŭ kơnòm dềt 5 sơnam in nàng pơyoa tus mờ mè bèp kơnòm dềt in sền bal mờ bơto ală sau in tàm hìu.

Dùl ơdŭ bơsram tơn tàm thị trấn Phước An, kơnhoàl Krông Pách

Gơwèt mờ ală kấp bơsram dờng rlau bè: kấp bàr, kấp pe, Giáo dục thường xuyên, bơdìh mờ broă lơh di pal niam jơnau sồr rcang sơndră kòp, ală hìu bơsram neh rcang lài sac rơwah gùng dà bơto bơtê mờ bơsram, tam gơl niam broă bơto bơtê jat tơl tŭ tơngai, tơl tiah ai gơ in di pal mờ geh cồng nha. Klau pơgru Đặng Như Sang, phó Hiệu trưởng Hìu bơsram kấp bàr Phước An, thị trấn Phước An, kơnhoàl Krông Pách, càr Dăk Lăk pà gĭt: 

Kuang đơng lam bồ hìu bơsram neh gĭt loh ngan nùs nhơm “sơndră mờ kòp bè tam dră mờ bol sò tơm” rcang lài nùs nhơm tam gơl bơta bè ngai do dê hơ̆ là gam bơsram tàm internet mơya dilah gơtìp bơta lơi bol añ rcang lài tam gơl tus bơsram tơn tàm internet tơn. Tàm tơngai bơsram tơn, bol añ geh sồr ală cau pơgru lời tŭ tơngai kuơ màng nàng bơto bơtê tơrgùm den cau pơgru geh bơto ală jơnau gĭt wă tờm ngan rlau jơh, kuơ màng ngan rlau jơh ai kơnòm bơsram in, ai tơngai gam wơl pal tam gơl bơsram tơn tàm internet den geh ngui ală tiết bơsram hơ̆ nàng bơsram wơl, pờ ơnàng, bơsram wơl jơnau gĭt wă ai kơnòm bơsram in.

Ơdŭ bơsram “Chèu phồng” tàm kơnhoàl Krông Bông

Ai tàm kơnhoàl tiah sar lơgar ngài Krông Bông, Hội đồng Đội kơnhoàl Krông Bông neh bơyai lơh ơdŭ bơsram “Chèu phồng”, bơh ơruh pơnu, cau bơsram dờng pơlam bơsram ai tơl mpồl kơnòm bơsram in tàm tiah ơm kis tơn. Rlau 1 nhai do, bơdìh mờ broă bơsram online, bàr pe nă cau bơsram dờng bơh Đại học Đà Nẵng, pah ngai den rò ală kơnòm bơsram ơdŭ 1 rê tàm hìu he dê nàng pơlam bơsram sră. Do là ală kơnòm geh rài kis kal ke ờ geh măy tính, điện thọai ngac ngar nàng bơsram tàm internet. Cau bơsram dờng Nguyễn Bích Phương pà gĭt, tài bơh kòp Covid-19 den oh ờ gơtùi lòt Đà Nẵng mờ pal ơm tàm hìu bơsram online. Bơdìh mờ tŭ jiơ bơsram, oh tus bal dong kờl ơdŭ bơsram “Chèu phồng”.

Geh gĭt tàm kơnhoàl geh lam lơh ơdŭ bơsram khăn phồng nàng dong ală kơnòm dềt geh rài kis kal ke halà ờ tơl bơta nàng bơsram online. Añ neh cih mat tus bal pơgồp dùl ết bơta pràn dềt rơhền he dê nàng dong ală kơnòm dềt sơrlèt gan broă bơsram online tàm tơngai kòp kal ke bè tŭ do. Tŭ sền gŏ ală kơnòm dềt geh bơsram pah ngai añ gơ lơh chờ hờp ngan ai ală oh in tài bơh neh bơsram tơl làm.

Krông Bông là kơnhoàl tiah sar lơgar ngài bơh càr Dăk Lăk dê. Tàm tiah do, tŭ kòp Covid-19 geh kơryan, kơnòm bơsram trung học phổ thông neh tus hìu bơsram nàng bơsram tơn. Mìng is kơnòm bơsram kấp dùl kung gam pal bơsram online. Bi Bùi Tấn Lợi, Chủ tịch Hội đồng đội kơnhoàl Krông Bông pà gĭt: broă bơyai lơh ală ơdŭ bơsram “Chèu phồng” tàm ală thôn, ƀòn nàng dong kờl ală kơnòm bơsram sră tàm tơngai kòp. Jat hơ̆, ală cau tus bal dong kờl is tus tàm hìu kơnòm bơsram halà tơrgùm bơh 2 tus 3 nă kơnòm rê tàm hìu he dê nàng pơlam bơsram jơnau bơsram mờ pal lơh jat ală jơnau sồr bè rcang sơndră kòp Covid-19.

Do là ơdŭ bơsram di tŭ ngan nàng dong ală kơnòm dềt in. Ală cau tus bal dong kờl is là ală gơ̆p bơyô ơruh pơnu, đoàn viên, cau bơsram dờng, ală cau pơgru Tổng phụ trách đội cèng măy tính, điện thoại tus tàm hìu ală kơnòm dềt. Tŭ do, bol añ gam pờ sùm 10 ơdŭ bơsram sră. Do là broă lơh pa mờ geh kuơ ngan tàm tơngai bè tŭ do mờ tàm tơngai tus.

Tềng đap bơta gơlik geh ờ gơtùi gĭt lài bơh bơta kòp dê, UBND càr Dăk Lăk neh jàu gơnoar ai ală tiah in lơh nền is broă lơh bơto bơtê di pal. Mò Lê Thị Kim Oanh, Phó Kuang atbồ Sở Giáo dục – Đào tạo càr Dăk Lăk pà gĭt, gah bơto bơtê Dăk Lăk neh gĭt wă tơl làm ală bơta kal ke mờ bơta lòng tàm tơngai kòp gam gơlik geh kal ke mờ jŏ jòng. Sở neh dan mờ UBND càr ai lài tơl broă lơh nàng gah bơto bơtê in tam gơl broă bơto bơtê, gơdờp mờ tơrmù ală bơta gơrềng ờ niam tus gah bơto bơtê, tàm bơnàng jă là ờ tam gơl jơnau kờñ gàr niam bơta niam.

Bơdìh mờ broă ală hìu bơsram rcang lài tàm broă lơh rcang sơndră kòp neh bè hơ̆, den gam geh broă rcang lài bơt bơtàu uă gùng dà bơto bơtê mờ bơsram krơi is nàng khat dùl bơta gơlik geh lơi kung gơtùi là tam gơl tus broă lơh bơto bơtê di pal mờ ală bơta. Bơh hơ̆ nàng broă lam lơh kơnòl broă dơ̆ lĕ bal, rcang sơndră kòp mờ gàr niam ală broă lơh bơto bơtê bơh hìu bơsram dê jat di mờ jơnau sồr.

Mờ bơta rcang lài, ngăc ngar nàng gơdờp mờ kòp Covid-19, gah bơto bơtê càr Dăk Lăk gam lơh ngan jơh nùs gàr niam jơnau kờñ ờdo ờdă mờ bơta niam tàm nam bơsram pa dùl bă niam ngan rlau jơh.

Jat VOV Tây Nguyên- Cau mblàng K’Hạnh