VOV4.K’ho- Nàng kờñ lơh geh jơnau kờñ geh 30% cau tơlik mat tĕ khà cau ùr gơ gơs Kuang bàng Hội đồng Nhân dân ală kấp, Mpồl tam klac cau ùr càr Dak Lak neh bơyai lơh pơrjum bơto pơlam tơnguh pràn jak ai cau ùr tơlik mat tĕ khà dơ̆ sơn rờp tus bal tơlik mat tĕ khà kuang bàng Hội đồng Nhân dân ală kấp tơngai lơh broă bơh nam 2021 tus nam 2026.

Ală kuang bàng tus bal pơrjum geh bơto pơlam ală tơngume bè yal tơnggit kơnòl, gơnoar broă bơh Hội đồng Nhân dân mờ kuang bàng Hội đồng Nhân dân dê; ờ uă broă bè lơh sa mpồl bơtiàn, niam chài bơh càr dê tàm tơngai lơh broă bơh nam 2016 tus nam 2021; gùng dà broă lơh tơngai bơh nam 2021 tus nam 2026. Pơlam bơta chài dong kờl lam sồr pơrlòng tĕ khà, bơta chài mblàng broă lơh bơh kuang bàng Hội đồng Nhân dân dê.

Jat Mpồl tam klac cau ùr Việt Nam càr Dak Lak đơs, nàng rơcang tus dơ̆ tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp càr Dak Lak tơngai lơh broă bơh nam 2021 tus nam 2026, càr geh pờ 4 ơdŭ bơto pơlam tàm ală kơnhoàl Krông Ana, Ea Hleo mờ ƀòn dờng Buôn Ma Thuột lời ai rlau 300 nă cau ùr dơ̆ sơn rờp tus bal tơlik mat tĕ khà kuang bàng Hội đồng Nhân dân ală kấp in.

Cau mblàng K’Duẩn