VOV4.K’ho- Ngai 06/06, Ủy ban Tĕ khà xã Cư San, kơnhoàl M’Drăk, càr Dăk Lăk neh bơyai lơh tĕ khà wơl nàng pồ kuang bàng Hội đồng Nhân dân xã, tơngai lơh broă bơh nam 2021- 2026 tàm 3 tiah tĕ khà là ală thôn: 9, 10 mờ 11.

Dăk Lăk bơyai lơh tĕ khà pồ wơl kuang bàng Hội đồng Nhân dân xã, tơngai lơh broă bơh nam 2021- 2026

Jơnau bơh tài pal tĕ khà pồ wơl là tài bơh tàm ngai 23/5/2021, tàm pe tiah tĕ khà sồ 9, 10 mờ 11 bơh xã Cư San dê geh khà cau tĕ khà lòt pồ ờ hềt lơh geh khà 50% kờp jơh khà cau tĕ khà cih tàm sră cih măt. Cih dờp tàm 3 tiah tĕ khà nùs nhơm tĕ khà geh lơh niam, di mờ adat boh lam. Tàm ală anih tĕ khà wơl, Ủy ban tĕ khà xã Cư San ai cau lơh sơnơ drơng broă sùm, pơlam cau tĕ khà lơh jăt jơnau sồr ơm yah ngài đah cau do mờ cau ne mờ rơcăng dà sơnơm ràu kloh khuẩn, măy đo was să jan, chèu sơnơm...nàng lơh jăt di jơnau sồr bè rơcăng sơndră kòp. Lồi dŭt, kờp tus mang ngai 06/06, pe tiah tĕ khà pồ wơl kuang bàng Hội đồng Nhân dân xã Cư Sa geh khà cau tĕ khà lòt tĕ khà, bè do: tàm tiah tĕ khà sồ 9 geh rlau 88%, tàm tiah tĕ khà sồ 10 geh rlau 74% mờ tàm tiah tĕ khà sồ 11 lơh geh rlau 22%.

Cau mblàng Lơ Mu K’Yến