VOV4.K’ho- Nàng kờñ dong kờl làng bol bơh ƀòn dờng Hồ Chí Minh geh càr Dăk Lăk wă rê tàm mang ngai 10/8, Đoàn ơruh pơnu mpồl ală anih lơh broă mờ mpồl lơh sa kă bro càr Dăk Lăk bơyai lơh broă lơh “Hìu bềp trŭ sa mang ơruh pơnu dê” nàng trŭ gơm 500 bơnah phan sa ờ sa priă ai làng bol rê bơh tiah kòp in. Tơl bơnah phan sa tàm hơ̆ geh pòr pơnô sur, dà toh tơngời mờ dà hùc ơn tàm khàr. Ală bơnah pòr geh ơn tàm hộp, ơn duh tàm thùng sốp mờ jun tus tiah ơm tơrgùm bal tàm Hìu bơsram phổ thông Dân tộc nội trú Nơ Trang Lơng càr Dăk Lăk dê.

Ală Đoàn viên ơruh pơnu tus bal trŭ gơm phan sa

Mang ngai 10/8, 345 nă cau geh wă rê tàm hơ̆ geh ală cau geh ai rê lài, bè: cau kra, kơnòm dềt, cau ùr geh bun, cau ùr gam ròng kòn dềt hơđơm 36 nhai; cau lòt kham kòp, cau lòt còp cau pròc mhàm bal, cau lơh broă ờ hềt gơtùi rê; cau gam dờp geh broă lơh dong kờl mpồl bơtiàn dê pah nhai; cau pròc mhàm bal mờ kơnòm dềt hơđơm 10 sơnam, cau kra, cau ùr geh bun, cau kòp... geh jơnau kờñ rê wơl tàm tiah ơm kis. Làng bol geh rê tơnơ̆ tŭ test mhar dilah geh cồng nha ờ bơtờp kòp geh ai ơm yah ngài tơrgùm bal tàm ală tiah 14 ngai mờ pơn jat tai kham să jan tàm hìu 7 ngai. Cau lơi bơtờp kòp geh jun rê tàm anih sơm kòp bơh càr dê.

Kung tàm ngai 10/8 sơl, broă lơh lơh broă nùs nhơm niam “Rơndeh kờñ gơboh” neh jun phan bơna ngui sa kờñ pal geh dong kờl làng bol tàm tiah ơm yah ngài tàm xã Ia R’vê, kơnhoàl Ea Súp, càr Dăk Lăk. Broă lơh bơh Mpồl cau ùr Mpồl ling sền gàr tiah nhàr lơgar càr dê pơgồp bal mờ mpồl lơh broă nùs nhơm niam Thiện Tâm 47 mờ ală mpồl cau dong kờl dê lam lơh.

Pơyua pà phan ai làng bol tàm anih gròi sền kòp in

Tàm xã Ia R’vê, mpồl neh pơyua pà 30 bơnah phan ai ală hìu bơnhă làng bol kal ke tàm thôn 8 in gam lơh jăt jơnau sồr ơm yah ngài tàm hìu. Tơl bơnah phan pà, geh: 5 kĭ phe, dùl thùng ƀung mi, tơngi sa, dà màn, ƀòk ngòk, ƀanh bùnh, puăc ƀŏ klơm mờ 100 rbô đong priă măt. Ală bơnah phan pà geh mpồl ala măt thôn dờp mờ jàu wơl ai ală hìu bơnhă in. Bal mờ hơ̆, mpồl gam dong kờl 500 kĭ biăp, bùm, kơnuh, plai chi ai làng bol in; pà 500 khàr dà hùc mờ 100 krơh ndơl dà gơ prañ ai cau ling gam lơh kơnòl broă tàm ală anih gròi sền mờ kơryan kòp in.

Cau mblàng K’Hạnh mờ Lơ Mu K'Yến